Mu gihe perezida wa Tanzania John Pombe Magufuli agikomeje gukina umukino avuga ko iki cyorezo cya Covid-19 gisa n’icyacitse mu gihugu, umuturage wo muri iki gihugu yashyize ahagaragara amashusho avuga ko abaturage bagenzi be bari gupfira mu mazu yabo bazize iki cyorezo.

Sponsored Ad

Kenyan Post yatangaje inkuru y’uyu muturage tariki ya 20 Kamena, yavuze ko yari agambiriye kumenyesha Isi ibiri kubera muri Tanzania byagizwe ibanga nk’uko aya makuru yagiye asakara mu minsi yashize. Yagize ati:

Abantu bari gupfira mu mazu nk’imbwa, abakozi bo mu nzego z’ubuzima bakabasohoramo, bakabashyingura mu ibanga.

Mu mashusho yashyizwe ahagaragara nyuma y’ayo umunyamakuru wo muri Uganda ukorera ikinyamakuru The Independent, Andrew Mwenda, yashyize ku rubuga rwa Twitter tariki ya 1 Gicurasi 2020, yagaragazaga abaganga bari gushyingura uwishwe na Covid-19 mu ijoro, mu gikorwa cyakozwe mu ibanga rikomeye.

Tanzania ni kimwe mu bihugu bitigeze bishyiraho ingamba zikaze zo guhangana na Covid-19, zirimo gahunda ya Guma mu Rugo. Ni igihugu kandi gitangaza gake imibare y’ubwandu, bikavugwa ko n’itangazamakuru ry’imbere mu gihugu ryabujijwe kugira icyo ritangaza kuri iki cyorezo.

Kuva aya makuru yajya hanze, Guverinoma ya Tanzania ntacyo yigeze itangaza keretse kuvuga gake ko imibare yagiye igabanyuka babikesheje amasengesho basenze Imana, nk’uko Perezida Magufuli yakunze kubitangaza.