Ku wa Mbere w’icyumweru gishize nibwo ikigo gikora inkingo cya Pfizer ku bufatanye na BioNTech byemeje ko bigiye gusohora urukingo ruzabasha kurinda icyorezo cya Covid-19 ku kigero cya 90%.

Sponsored Ad

Ibi bigo byemeje ko mu mwaka w’2021, bizasohora doze miliyari 1.3, izigera kuri miliyari 1.1 (zingana na 80%), ariko zikaba zizabonwa n’umugabo zigasiba undi kuko zamaze gutangwaho ‘komande’ n’ibihugu bikize ku Isi bizikeneye.

Ibihugu bihugu bizagura izi doze zose birimo Leta Zunze Ubumwe z’Amerika ziteganya gufataho izigera kuri miliyoni 600, ibihugu bigize Umuryango w’Ubumwe bw’Uburayi bizafataho miliyoni 300, u Bwongereza buzafata miliyoni 40, u Buyapani buzafata miliyoni 120, Canada ifate miliyoni 20, New Zealand ifate miliyoni 1.5.

Ibindi bihugu bibikennye ntibizabona uru rukingo vuba nkuko Radiyo NPR ikorera i Washington muri USA yabitangaje yibaza uko ibihugu bikennye bizabona uru rukingo, mu gihe bigaragara ko bimwe mu bihugu bikize bizarwikubira.

Radiyo NPR yaboneyeho kubaza Dr. Rachel Silverman uyoboye umuryango udaharanira inyungu wa Center for Global Development ukora ubushakashatsi bwibanda ku buzima, we avuga ko: “Byumvikana ko inkingo ari nyinshi ariko si ko bimeze. Kuko inyinshi zamaze gufatirwa komande.”

Yakomeje ati: “[Doze] zizaba zisigaye si nyinshi. Ku bihugu bikennye n’ibiri mu nzira y’iterambere, bisa n’aho izi nkingo zitazabigeramo kugeza umwaka urangiye.”

Silverman yavuze ko uburyo izi nkingo za Pfizer zakozwemo, bigoye kuzitwara no kuzibika kuko ngo bisaba ahantu zatwarwa cyangwa zigashyirwa ahantu hakonje bikabije, kuri dogero -80. Iyi ngo ni indi mbogamizi kuri ibi bihugu bitaratera imbere bihagije.