Mu gihugu cya Kenya abaganga n’ abaforomo bakora mu bitaro n’ ibigo nderabuzima bya Leta baretse ku kuvura bajya mu myigaragambyo yo gusaba umushahara, bituma abarwayi barindwi bashiramo umwuka kubera kubura ababitaho.
Iyo myigaragambyo yatangiye ku 5 Ukuboza 2016, yabaye mu gihugu hose ku buryo ku bitaro binyuranye abarwayi babuze ababavura, byatumye bamwe mu bagore batwite babyarira ku miryango y’ibitaro.
Daily Nation yatangaje ko abarwayi barindwi bapfuye kuri uyu wa Mbere ubwo iyi (...)

Sponsored Ad

Mu gihugu cya Kenya abaganga n’ abaforomo bakora mu bitaro n’ ibigo nderabuzima bya Leta baretse ku kuvura bajya mu myigaragambyo yo gusaba umushahara, bituma abarwayi barindwi bashiramo umwuka kubera kubura ababitaho.

Iyo myigaragambyo yatangiye ku 5 Ukuboza 2016, yabaye mu gihugu hose ku buryo ku bitaro binyuranye abarwayi babuze ababavura, byatumye bamwe mu bagore batwite babyarira ku miryango y’ibitaro.

Daily Nation yatangaje ko abarwayi barindwi bapfuye kuri uyu wa Mbere ubwo iyi myigaragambyo yari irimbanyije. Muri bo harimo bane baguye mu bitaro byo mu turere twa Kiambu na Mbagathi, umwe muri Kisumu mu gihe abandi babiri baburiye ubuzima i Kinango.

Hirya no hino muri iki gihugu, intero mu baganga n’abaforomo yari imwe, bavuga ko batari bukore byatumye bamwe mu barwayi batitabwaho cyangwa ngo babe bahabwa imiti.

Iki kinyamakuru kivuga ko kiboneye mu mavuriro anyuranye aho abarwayi barimo abahiye biriwe baryamye ku zuba nta kuvurwa, byibura ngo bashyirweho umuti ugabanya ububabare.

James Kariuki, umwe mu barwaza avuga ko umubyeyi we yapfuye mu ijoro ryo ku cyumweru akabura ugeza umurambo mu buruhukiro ndetse ko hari n’imirambo ibiri yari ikiri ku bitanda by’ibitaro yabuze abayijyana mu buruhukiro. Avuga ko Leta ikwiye gukemura ikibazo cy’abaganga iyi myigaragambyo ikarangira.

Uretse aba bitabye Imana, ejo ku wa Mbere kandi mu bitaro bya Mathari, abarwayi bo mu mutwe barenga 100 batorotse ibitaro mu gihe abaganga bari muri iyo myigaragambyo.

Ikinyamakuru Standard Media kivuga ko abagerwaho n’ingaruka bashobora gukomeza kwiyongera mu gihe Leta ya Kenya itagize icyo ikora binyuze mu biganiro n’abo baganga.

Nyuma y’aho Perezida Uhuru Kenyatta asabye ko haba ibiganiro n’abaganga bikananirana, Minisiteri y’Ubuzima n’abakuriye inama ya ba Guverineri bavuze ko bagiye gushyiraho komite yo gukurikirana iki kibazo.

Abaganga n’abaforomo bari mu myigaragambo bagaragaza ko batiteguye gusubira mu kazi mu gihe Leta ya Kenya itagize icyo ikora ku busabe bwabo.

Abo baganga barasaba leta kubahiriza amasezerano bagiranye mu 2013, abemerera kubongerera umushahara ho 300%. Ayo masezerano kandi akubiyemo ibyo guhindura imiterere y’akazi k’ubuganga muri iki gihugu n’uburyo kuzamura abaganga mu ntera bikorwa.