Urukiko rwihariye rw’i Islamabad muri Pakistan rwakatiye urwo gupfa General Pervez Musharraf wahoze ari perezida w’iki gihugu.

Sponsored Ad

Uru rubanza rwahereye mu 2013, uyu munsi, uyu mugabo yahamijwe ubugambanyi bukomeye.

Gen Musharraf yafashe ubutegetsi kuri ’coup d’état’ ya gisirikare mu 1999, aba perezida w’igihugu kuva mu 2001 kugeza mu 2008.

Kuva mu 2016 ari i Dubai nyuma yo kwemererwa kuva mu gihugu ngo ajye kwivuza.

Ibyaha aregwa bishingiye ku kuvanaho itegeko nshinga mu 2007 agatangaza ibihe bidasanzwe mu gihugu mu mugambi wo gushaka kuguma ku butegetsi.

Musharraf yashyigikiye perezida Bush mu bikorwa bye ku iterabwoba

Mu ntangiriro z’uku kwezi, aho ari mu bitaro, Bwana Musharraf yasohoye amashusho (video) avuga ko ibyo aregwa "nta shingiro bifite".

Niwe mutegetsi wa mbere wa gisirikare muri Pakistan ugejejwe imbere y’ubutabera kubera kurenga ku biteganywa n’itegeko nshinga.

Ibyo aregwa ni ibiki?

Mu kwezi kwa 11/2007 yatangaje ibihe bidasanzwe, ahagarika kubahiriza itegeko nshinga, ibi byateye imyigaragambyo yaguyemo abantu. Mu 2008 yareguye.

Ubwo Nawaz Sharif - mukeba we yavanye ku butegetsi mu 1999 - yatorwaga nka minisitiri w’intebe mu 2013 yahise ashinga urubanza rumurega ubugambanyi.

Gen Musharraf yavuze ko ibyo aregwa bishingiye ku mpamvu za politiki kuko ibyo yakoze mu 2007 byemewe na guverinoma.

Itegeko nshinga rya Pakistan rivuga ko uhamwe n’ubugambanyi ahanishwa igihano cyo gupfa.

Kuva mu 2016, Gen Musharraf aba i Dubai, yanze kwitaba urukiko inshuro zose rwamuhamagaje.

Gen Musharraf ni inde?

Gen Musharraf ubu ufite imyaka 76, mu 1998 yagizwe umugaba w’ingabo za Pakistan.

Mu 1999 ingabo zashwanye na guverinoma yari iyobowe na minisitiri w’intebe Nawaz Sharif maze ziramuhirika, Bwana Musharraf afata ubutegetsi.

Kugeza mu 2008 Musharraf yarokotse ibikorwa byinshi byahigiraga kumwica cyangwa kumuhirika ku butegetsi.

Ku rwego mpuzamahanga azwi cyane kuba yarashyigikiye Amerika mu kiswe "intambara ku iterabwoba" nyuma y’ibitero kuri Amerika, nubwo mu gihugu batari babishyigikiye.

Mu 2008 uyu mugabo yavuye mu gihugu, ahagaruka mu 2013 aje kwiyamamaza mu matora y’umukuru w’igihugu ariko urukiko rurabimwangira.