Perezida wa Ghana Nana Akufo-Addo ubwo yagezaga ijambo ku banyagihugu kuri radio na televiziyo by’igihugu yabatangarije urutonde rw’ibiribwa gakondo 11 bakwiye kurya mu rwego rwo kwirinda icyorezo cya coronavirus.

Sponsored Ad

Mu butumwa yatambukirije kuri Radio na Televiziyo by’igihugu kuri iki cyumweru, yavuze ko mu rwego rwo gukomeza kwirinda iki cyorezo, abaturage bagomba kurya ibiryo byongera ubudahangarwa bw’umubiri.

Mu byo yababwiye harimo imineke, gombo, dawadawa, umuceri n’ibihumyo, amaronji, kontomire, ingano, noix de cajou, crabe (ingaru), kuko ngo ibyo biribwa birimo vitamine A, B6, C na E zongerera umubiri ubudahangarwa ntiwandure indwara.

Uyu mukuru w’igihugu kandi yanatangaje ko umukozi umwe wo mu ruganda rutunganya amafi yanduje abantu 533 wenyine, bagize 11% by’abanduye bose muri iki gihugu. Muri Ghana abamaze kwandura ni 4700.

Muri iki gihugu abamaze gukira coronavirus ni 494, abapfuye ni 22. Perezida Akufo yavuze ko abamaze gupimwa bose hamwe ari 160,501.

Perezida Nana Akufo yavuze ko ibikorwa bihuza abantu benshi nk’ amashuri, za kaminuza, bizakomeza kuba bifunze kugera mu mpera za gicurasi, Ati:

Gushyira mu bikorwa ingamba zacu zo gushaka abahuye n’abanduye, kubapima no kubavura niyo nzira nziza yizewe yo kurandura iyi virusi.

Icyorezo cya covid-19 kiracyahangayikishije Isi kuva mu ntangiriro z’uyu mwaka wa 2020. Kugeza ubu muri Afurika abamaze kwandura ni 64 752 abamaze guhitanwa nacyo ni 2 301 abakize ni 22 683

Nubwo bimeze gutya ariko muri Afurika hari Leta 11 zifite abarwayi ba covid-19 ariko zitaratakaza umuntu n’umwe azize icyorezo cya covid-19, izo Leta nizo turibandaho muri iyi nkuru ya UKWEZI.

Kuri uyu mugabane utuwe ku bwiganzwe n’Abirabura, Leta 53 muri 54 zose zifite abarwayi ba covid-19. Igihugu rukumbi gisigaye muri Afurika kitaragaragaramo umurwayi wa covid-19 ni Lesotho.