Umusirikare mu ngabo z’Uburusiya yishe bagenzi be umunani abarashe anakomeretsa bikomeye abandi babiri mu kigo cya gisirikare kiri mu burasirazuba bw’igihugu, nkuko abategetsi babivuga.

Sponsored Ad

Abategetsi bavuga ko Private Ramil Shamsutdinov watawe muri yombi bishoboka ko yari afite ibibazo by’uburwayi bwo mu mutwe.

Iryo raswa ryabereye mu itsinda rya girisikare (’unit’) rifite nimero 54160 rikorera mu cyaro cy’ahitwa Gorny, hafi y’umujyi wa Chita, ku mugoroba wo ku wa gatanu.

Iryo raswa ryabaye ku isaha ya saa kumi n’ebyiri n’iminota 15 z’umugoroba muri ako gace, nkuko akanama gakora amaperereza k’Uburusiya kabivuga.Hatangiye iperereza kuri ubwo bwicanyi.

Mbere, Minisiteri y’ingabo y’Uburusiya yavuze ko amasasu yarashwe ubwo abasirikare basimburaga abari basanzwe baba mu kigo cyo mu karere ka Transbaikal.

Bwana Shamsutdinov, wari winjiye igisirikare vuba, yishe abasirikare bakuru babiri n’abandi basirikare bagenzi be batandatu.

Ibitangazamakuru byo mu Burusiya bitangaza ko uwo ucyekwa yabapimaga mu mutwe.

Akanama kadasanzwe kayobowe na Andrey Kartapolov, Minisitiri wungirije w’ingabo, kafashe indege kerekeza aho byabereye gukora iperereza.

Iryo tsinda rya gisirikare rifite nimero y’akazi ya 54160 ririmo ingabo zirwanira ku butaka zirwanisha intwaro za rutura ndetse n’itsinda rirwanisha ibisasu bya misile. Rifite misile zo mu bwoko bwa ’Iskander’ zishobora kwikorera ku mitwe yazo ibisasu kirimbuzi bya nikleyeri.

Igisirikare gikorwa by’itegeko kuri buri mugabo wese w’Umurusiya ufite kuva ku myaka 18 kugera kuri 27 y’amavuko. Ubusanzwe bamara amezi 12 mu gisirikare, nyuma bakaba bashyira umukono kuri kontaro yo gukomeza nk’uwabigize umwuga mu ngabo z’Uburusiya.

Hagati mu myaka ya 2000, imiryango iharanira uburenganzira bwa muntu yatangaje ko higanje urugomo no kunnyuzura - bizwi ku izina rya "dedovshchina" - bikorerwa abasirikare bashya mu ngabo z’Uburusiya.

Ariko mu myaka ya vuba ishize, Uburusiya bwavuze ko butewe ishema no kugira igisirikare kigezweho ndetse ko bwaciye inyuzura mu gisirikare.