Kigali
startimes

Burundi: Evariste Ndayishimiye yatsinze amatora ya Perezida mu buryo bw’agateganyo

Amakuru   Yanditswe na: Dusingizimana Remy 25 May 2020 Yasuwe: 2224

Komisiyo y’igihugu y’amatora mu Burundi yamaze gutangaza ibyavuye mu matora y’umukuru w’igihugu by’agateganyo, aho Evariste Ndayishimiye w’ishyaka CNDD-FDD yaje imbere n’amajwi 68,72%.



Iyi komisiyo y’amatora yavuze ko hiyandikishije gutora abantu bagera kuri miliyoni 5,115, 418 naho abatoye bakaba ari 87,71% byabo.

Urutonde rw’uko abakandida barindwi bakurikiranye mu majwi yatangajwe;

Evariste Ndayishimiye (CNDD-FDD) - 68,72%

Agathon Rwasa (CNL) - 24,19%

Gaston Sindimwo (Uprona) - 1,64%

Domitien Ndayizeye (Kira Burundi) - 0,57%

Léonce Ngendakumana (FRODEBU) - 0,47%

Nahimana Dieudonné - 0,42%

Francis Rohero - 0,20%

Niba nta gihindutse, Evariste Ndayishimiye niwe utorewe kuba Perezida wa cyenda wa repubulika y’u Burundi muri manda y’imyaka 7 iri imbere.

Ndayishimiye azafatanya n’abadepite 72 batowe mu ishyaka CNDD FDD , 27 batowe muri CNL hamwe n’umudepite umwe watowe mu ishyaka Uprona.Abadepite bose hamwe bakazaba ari 100.

Gaston Sidimwo niwe watowe nk’umudepite wa UPRONA mu mujyi wa Bujumbura mu gihe Agathon Rwasa yatowe nk’umudepite mu ntara ya Ngozi avukamo.

Mu badepite 24 bagomba kongerwa mu nteko y’u Burundi,abagera kuri 15 bagomba kuba ari abagore hanyuma 6 bakaba ari abagabo kubera ko itegekonshinga rivuga ko abagore bagomba kuba 40 ku ijana ,abagabo bakaba 60 ku ijana.

Abo badepite bazongerwa mu nteko bagomba kuva mu mashyaka atatu ya mbere ariyo CNDD FDD, CNL na UPRONA n’abandi 3 bahagarariye Abatwa.

Iri tegekonshinga ry’u Burundi rikirimo ivanguramoko,rivuga ko mu nteko, Abadepite 60 ku ijana bagomba kuba ari Abahutu hanyuma 40 ku ijana bakaba Abatutsi.

Uyu perezida watowe ni muntu ki?

Evariste Ndayishimiye yari asanzwe ari umunyamabanga mukuru w’ishyaka riri ku butegetsi rya CNDD-FDD, umwanya ariho guhera mu kwezi kwa munani mu mwaka wa 2016.

Afatwa nka soma mbike wa Perezida ucyuye igihe Pierre Nkurunziza.

Bwana Ndayishimiye w’imyaka 52 y’amavuko, yavukiye muri komine Giheta mu ntara ya Gitega iri rwagati mu Burundi. Ni nayo irimo usigaye ari umurwa mukuru w’igihugu ari wo Gitega.

Azwi nk’umwe mu bari abasirikare bakomeye ubwo ishyaka CNDD-FDD ryari rikiri umutwe w’inyeshyamba, mu ntambara yadutse mu Burundi nyuma y’iyicwa rya Perezida Melchior Ndadaye wabaye perezida wa mbere wari utowe mu buryo bwa demokarasi mu kwezi kwa cumi mu 1993, amaze amezi atatu ku butegetsi.

Bwana Ndayishimiye ari mu barokotse ubwicanyi bwakorewe abanyeshuri b’Abahutu kuri Kaminuza y’u Burundi mu kwezi kwa gatandatu mu 1995, bituma asanga abandi barwanyi b’uwo mutwe w’inyeshyamba, icyo gihe witwaga CNDD, ishami ryawo rya gisirikare rikitwa FDD.

Uwo mutwe wari uyobowe na Léonard Nyangoma wawushinze mu 1994.

Nyuma yaho uwo mutwe wiswe CNDD-FDD umaze kwinjira mu masezerano y’amahoro y’i Arusha muri Tanzania mu mwaka wa 2000, Jenerali Majoro Ndayishimiye yakoze mu biro bikuru bya gisirikare.

Nyuma yaje kugirwa Minisitiri w’ubutegetsi bw’igihugu kuva mu 2006 kugera mu 2007, mbere yuko agirwa umunjyanama mu bya gisirikare mu biro bya perezida.

Yashakanye na Angélique Ndayubaha, ubu bakaba bafitanye abana umunani.

Mu kwiyamamaza kwe, Bwana Ndayishimiye yashyize imbere gahunda zirimo ibijyanye no gukomeza inzego z’umutekano n’ubwirinzi, gukomeza urwego rw’ubucamanza, imiyoborere myiza, imibereho y’abaturage, ibijyanye n’urwego rw’ubuzima, kurwanya ibura ry’akazi (ubushomeri/chômage), guteza imbere ibijyanye no kubungabunga ibidukikije, umuco n’imikino.

Mu kwiyamamaza kwe kandi yagarutse kuri gahunda z’ubukungu bushingiye ku buhinzi n’ubworozi, umutungo kamere, ubucuruzi, gutwara abantu n’ibintu, n’ibijyanye n’inganda.

Evariste Ndayishimiye yasezeranyije gukomeza umubano n’amahanga ndetse n’umubano hagati y’u Burundi n’imiryango itandukanye.

Mu cyegeranyo Ishyaka CNL ryaraye rishize hanze, ryemeje ko ryatahukanye intsinzi rigendeye ku mibare ryahawe n’abari bahagarariye amatora.

Mu kiganiro cyihariye yagiranye n’Ijwi ry’Amerika ku munsi wa kane, Agathon Rwasa yavuze ko "Amatora yabayemo ubujura" bukabije.

Agathon Rwasa yavuze kandi ko atishimiye uko amatora yagenze ndetse yiteguye kujya kuregera inkiko ubwo amajwi yose azaba amaze kujya ahagaragara.

Source:BBC

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?
    Log in

    Amategeko n'amabwiriza birkurikizwa


Inzindi nkuru

Zambia yamaganye yivuye inyuma ibyo ’Sankara’ yashinje Perezida...

Ibiro bya perezida wa Zambia byatangaje ko byababajwe no kumva mu...
15 July 2020 Yasuwe: 779 0

Perezida Evariste Ndayishimiye aravugwaho gushyiraho abaguverineri 6 bose...

Perezida mushya w’u Burundi, Evariste Ndayishimiye, aravugwaho gushyiraho...
12 July 2020 Yasuwe: 3096 0

Sudan: Hakuweho ibihano byo kunywa inzoga ku batari abayisilamu...

Nyuma y’imyaka irenga 30 y’ubutegetsi bwa kisilamu, leta ya Sudan yakoze...
12 July 2020 Yasuwe: 1361 1

Abiyomoye kuri RNC ya Nyamwasa bashinze undi mutwe mushya

Uguhuzagurika muri RNC kurakomeje umunsi ku wundi. Nyuma y’uko bamwe mu bari...
12 July 2020 Yasuwe: 2299 0

Mali: igitutu cy’imyigaragambyo cyatumye Perezida asesa urukiko...

Perezida Ibrahim Boubacar Keita wa Mali yaraye atangaje iseswa ry’urukiko...
12 July 2020 Yasuwe: 740 0

Tanzania: Magufuli yemejwe nk’umukandida wa CCM mu matora ya...

Inama nkuru y’ishyaka riri ku butegetsi ’Chama Cha Mapinduzi’ (CCM) yemeje...
11 July 2020 Yasuwe: 1036 0