skol
Kigali
startimes

Inshuti ya Trump yamushishikarije kwemera ko yatsinzwe amatora ya US

Amakuru   Yanditswe na: Dusingizimana Remy 23 November 2020 Yasuwe: 4148

Inshuti ikomeye ya Donald Trump yamushishikarije kureka umuhate we wo kugerageza kuburizamo ibyavuye mu matora ya perezida byerekanye ko yatsinzwe na Joe Biden.


Chris Christie wahoze ari Guverineri wa leta ya New Jersey yavuze ko itsinda ry’abanyamategeko ba Trump "riteje isoni mu gihugu".

Perezida Trump yanze kwemera ko yatsinzwe amatora, avuga ko - nta gihamya atanze - habayeho uburiganya mu matora ahantu henshi.

Abarepubulikani benshi bashyigikiye umuhate we wo mu rwego rw’amategeko, ariko bacye ariko barimo kwiyongera bo bitandukanyije na we kuri iyo ngingo.

Ku wa gatandatu, Bwana Trump yahuye n’ibibazo muri leta ya Pennsylvania, nyuma yuko umucamanza atesheje agaciro ikirego cy’itsinda ryari rishinzwe kumwamamaza.

Ryasabaga ko ibyavuye mu matora muri iyo leta, iba ari isibaniro, bigirwa impfabusa ku bantu babarirwa muri za miliyoni batoye bakoresheje uburyo bw’iposita.

Mu cyemezo gikarishye, umucamanza Matthew Brann yavuze ko urukiko rwe rwagejejweho "ingingo zinaniwe mu rwego rw’amategeko zidafite ishingiro ndetse n’ibirego bishingiye ku guhwihwisa".

Icyo cyemezo cy’umucamanza cyaciriye inzira leta ya Pennsylvania yo kwemeza kuri uyu wa mbere ko Bwana Biden ari we watsinze amatora muri iyo leta.

Muri Pennsylvania, Biden, umudemokarate watorewe kuba perezida, arusha Trump amajwi arenga 80,000.

Ariko, itsinda ryamamazaga Trump ririmo kujuririra icyo cyemezo.

Bigaragara ko Bwana Biden yatsinze Perezida Trump n’amajwi 306 kuri 232 ya Trump y’intumwa zitora (electoral college) - uburyo Amerika itoramo perezida - aruta kure amajwi 270 aba acyenewe kugira ngo umukandida atsindire kuba perezida.

Chris Christie yavuze iki?

Ku cyumweru, ari mu kiganiro This Week kuri televiziyo ABC, Bwana Christie, wahoze ari Guverineri wa New Jersey, yagize ati:

"Mvugishije ukuri rwose, imyitwarire y’itsinda ry’abanyamategeko ba perezida riteje isoni mu gihugu".

Yavuze ko uruhande rwa Trump akenshi rwagiye ruvuga ko habayeho uburiganya mu matora rubivugira "hanze y’icyumba cy’urukiko, ariko iyo bagiye imbere mu cyumba cy’urukiko ntabwo bavuga iby’uburiganya..."

Yagize ati: "Maze igihe nshyigikiye perezida. Namutoye inshuro ebyiri. Ariko amatora agira ingaruka, kandi ntabwo dushobora gukomeza gukora nkaho ikintu cyabaye hano kandi kitarabayeho".

Mu mwaka wa 2016, Bwana Christie ni we wabaye Guverineri wa mbere washyigikiye Bwana Trump nk’umukandida-perezida.

Ndetse muri uyu mwaka yanafashije Perezida Trump kwitegura ibiganiro mpaka na Bwana Biden.

BBC

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Abasirikare bakoze ku mabere y’umugore wa Bobi Wine ubwo yari afungiye mu...

Umunyapolitiki Robert Kyagulanyi Ssentamu (Bobi Wine) utavuga rumwe...
28 January 2021 Yasuwe: 4411 0

Bobi Wine yarekuwe ajya hanze nyuma y’iminsi 10 afungiwe mu rugo...

Ku nshuro ya mbere kuva tariki 14 z’ukwezi kwa mbere umunsi wabayeho...
26 January 2021 Yasuwe: 5343 0

Perezida Ndayishimiye yahishuye ko u Burundi n’u Rwanda bigiye kubana neza...

Nyuma yo gutorwa k’umunyamabanga mukuru mushya w’ishyaka riri ku butegetsi mu...
25 January 2021 Yasuwe: 5421 0

Abavuye muri Tanzania na DR Congo ntibemerewe kwinjira muri UK kubera...

Ubwongereza bwatangaje ingingo ibuza abagenzi bose bavuye muri Tanzania na...
22 January 2021 Yasuwe: 3259 0

Joe Biden yinjiye bwa mbere muri White House ahita akora impinduka...

Nyuma y’amasaha make Joe Biden arahiye,Joe Biden yahise yerekeza muri White...
21 January 2021 Yasuwe: 6261 1

Joe Biden yarahiye ku mugaragaro aba Perezida wa 46 wa US

Joe Biden amaze kurahirira kuba Perezida wa 46 wa Leta Zunze Ubumwe za...
20 January 2021 Yasuwe: 4428 0