skol
fortebet

Ubushinwa bwakuye mu myanya abayobozi bitwaye nabi ku kibazo cya Coronavirus

Yanditswe: Tuesday 11, Feb 2020

Sponsored Ad

Ubushinwa "bwakuyeho" abategetsi benshi bo ku rwego rwo hejuru kubera uko bitwaye mu kibazo cya coronavirus - mu gihe umubare wabo imaze kwica muri iki gihugu umaze kurenga 1,000.

Sponsored Ad

Umunyamabanga w’ishyaka riri ku butegetsi mu kanama k’ubuzima ko mu ntara ya Hubei, ndetse n’umukuru w’ako kanama, ni bamwe mu birukanwe ku kazi.

Ni bo bategetsi bakomeye birukanwe kugeza ubu.

Umukuru wungirije y’umuryango utabara imbabare Croix-Rouge muri ako karere na we yakuwe ku kazi kubera "guta inshingano" ze "mu gucunga imfashanyo".

Ejo ku wa mbere, abantu 103 bishwe na coronavirus mu ntara ya Hubei honyine, umubare munini wa mbere ubayeho muri iyo ntara, abamaze kwicwa na coronavirus ubu bageze ku 1,016.

Ariko umubare w’abayandura bashya mu gihugu ejo wagabanutseho ku kigero kigera hafi ku 20% ugereranyije no ku munsi wabanje, uva ku bantu 3,062 bagera ku 2,478.

Ejo ku wa mbere kandi, umukuru w’akanama gashinzwe ubuzima mu ntara ya Hubei yemeje ko abantu 2,097 bashya banduye ubu bwoko bushya bwa coronavirus muri iyo ntara, bavuye ku 2,618 ku munsi wabanje.

Ubu mu Bushinwa hari abantu 42,200 banduye coronavirus, iki kikaba ari cyo cyorezo kibi cyane kibasiye iki gihugu nyuma y’icyorezo cya Sars cyo mu 2002 kugera mu wa 2003.

Nkuko bitangazwa n’igitangazamakuru cya leta y’Ubushinwa, hamaze kwirukanwa ku kazi abantu babarirwa mu magana kubera coronavirus.

Ariko gukurwa ku mwanya runaka - nubwo bibonwa nko kutishimira imikorere - ntabwo buri gihe biba bivuze ko uwo muntu azirukanwa burundu, kuko bishobora no kuvuga kumanurwa mu ntera.

Bijyanye kandi no gukurwa ku kazi, abategetsi bashobora no guhanwa n’ishyaka rya gikomunisiti riri ku butegetsi mu Bushinwa.

Urugero, Zhang Qin, umukuru wungirije wa Croix-Rouge, "yaburiwe bikomeye mu ishyaka kubera imikorere mibi", nkuko bitangazwa n’igitangazamakuru cya leta.

Mu ntangiriro y’uku kwezi, umukuru wungirije w’ibiro by’ibarurishamibare i Wuhan yakuweho, na we "aburirwa bikomeye mu ishyaka kubera imikorere mibi yo kurenga mu mabwiriza yo gutanga ibyo kwipfuka mu maso".

Umukuru w’akanama k’ubuzima i Huanggang, umujyi wa kabiri wugarijwe bikomeye na coronavirus nyuma ya Wuhan, na we yakuwe ku mirimo ye.

Mu minsi ya vuba ishize, abategetsi bo mu Bushinwa bakomeje kunengwa kubera ukuntu bari kwitwara mu kibazo cya coronavirus.

Urupfu rwa muganga wari waburiye ko hateye virusi idasanzwe ariko impuruza ye ikaburizwamo n’abategetsi, rwateje uburakari mu baturage.

Inkuru ya BBC

Leave a Reply

Your email address will not be published. Required fields are marked *

Who are you?

Amategeko n'amabwiriza birkurikizwa