Kigali

Umusoro ku bikoresho by’abagore bari mu mihango ugiye kuvanwaho muri Australia

Amakuru   Yanditswe na: Nsanzimana Ernest 3 October 2018 Yasuwe: 645

Australia yatangaje ko kigiye gukuraho umusoro utavugwaho rumwe ku bikoresho by’isuku byifashishwa n’abagore mu gihe bari mu mihango, nyuma y’imyaka yari ishize amashyirahamwe y’abagore ahirimbanira ko uwo musoro ukurwaho.

Kuri ubu, ibitambaro by’isuku n’ibindi bikoresho byifashishwa n’abagore bari mu mihango bigurishwa hongeweho umusoro wa 10% kubera ko bifatwa nk’ibicuruzwa bitari ingenzi.

Abagore bamaze igihe bavuga ko icyo cyiciro ibyo bikoresho byashyizwemo kidashyira mu gaciro, bakavuga ko ibindi bikoresho nk’udukingirizo byo bisonerwa uwo musoro.

Kuri uyu wa gatatu rero, leta zigize Australia zemeranyijwe kuvanaho uwo musoro ku bikoresho abagore bifashisha bari mu mihango.
Kelly O’Dwyer, minisitiri w’abagore muri Australia, yabwiye igitangazamakuru Sky News Australia ati:
"Ni ukuri twishimiye ko buri wese yemeye gukuraho uyu musoro udashyira mu gaciro."

Yongeyeho ati: "Abagore babarirwa muri za miliyoni mu gihugu hose barabyishimira."
Uyu musoro ku bikoresho by’isuku abagore bifashisha bari mu mihango, watangiye kwamaganwa muri Australia kuva washyirwaho mu mwaka wa 2000.

Abagore benshi, barimo na bamwe bamaze igihe bahirimbanira ko uwo musoro ukurwaho, kuri uyu wa gatatu bishimiye uwo mwanzuro babinyujije ku rubuga nkoranyambaga rwa Twitter.

Ni icyemezo cyagizwemo uruhare n’ubutegetsi rusange bwa leta zigize Australia, ubundi bwari bwaramaganwe na leta zigize iki gihugu zivuga ko gukuraho uwo musoro byagabanya umusoro zinjiza.

Mu mwaka wa 2015, inyandiko isaba ko uwo musoro uvanwaho yashyizweho umukono n’abarenga ibihumbi 90.
Byitezwe ko leta zigize Australia zizatakaza amafaranga y’umusoro agera hafi kuri miliyoni 30 z’amadolari ya Australia kubera iyo mpinduka.

Scott Morrison, minisitiri w’intebe wa Australia, yigeze kuvuga ko ibitambaro by’isuku byifashishwa n’abagore mu gihe bari mu mihango bitagakwiye kuba byarashyizwe ku rutonde rw’ibicuruzwa bisoreshwa.

Mu kwezi kwa karindwi uyu mwaka, Ubuhinde bwakuyeho umusoro wa 12% ku bikoresho nk’ibyo by’isuku abagore bacyenera mu gihe bari mu mihango, nyuma y’ibikorwa nk’ibyo byari byabaye byo kuwamagana.

Mu Bwongereza, umusoro wa 5% uracyakwa ku bikoresho nk’ibyo by’isuku abagore bifashisha bari mu mihango, nubwo bwose impirimbanyi zimaze igihe zisaba ko uwo musoro uvanwaho.

Author : Nsanzimana Ernest

Nsanzimana Ernest ni Umwanditsi mukuru w’Ikinyamakuru Umuryango. Yatangiye gukorera iki kinyamakuru muri Nzeli 2016, afite Impamyabumenyi y’Icyiciro cya Kabiri cya Kaminuza (A0) mu Itangazamakuru n’Itumanaho yakuye muri Kaminuza y’u Rwanda Ishuri ry’ itangazamakuru n’ itumanaho

Ibitecyerezo

  • Log in

    Amategeko n'amabwiriza birkurikizwa


Inzindi nkuru

Nyuma y’igihe kitari gito Internet yarahagaritswe gukoreshwa muri DRC...

Muri Repubulika iharanira Demokarasi ya Congo, hongeye gusubizwaho...
20 January 2019 Yasuwe: 1590 0

Madame Louse Mushikiwabo yagize icyo asaba Abanyepolitiki ba...

Umunyamabanga Mukuru w’Umuryango mpuzamahanga w’ibihugu bivuga ururimi rw’...
11 January 2019 Yasuwe: 3356 0

Perezida Kagame n’umufasha we ’Jeanette Kagame’ bambitswe imidali...

Ku mugoroba wo kuri uyu wa Gatatu, i Abidjan muri Côte d’Ivoire, Perezida...
20 December 2018 Yasuwe: 7908 0

Birangiye u Burundi bugiye kwitabira inama ya 20 y’abakuru b’ibihugu bigize...

Leta y’u Burundi yemeye ko izitabira Inama ya 20 y’Abakurub’Ibihugu bigize...
16 December 2018 Yasuwe: 7351 0

Amerika irashinja Ubushinwa n’Uburusiya kubohera Afurika mu madeni

Leta Zunze Ubumwe za Amerika zatangaje ko zigiye kureka ibikorwa...
14 December 2018 Yasuwe: 1733 0

Kongo: Komisiyo y’ amatora yafashwe n’ inkongi hasigaye iminsi 10 ngo...

Mu gitondo cyo kuri uyu wa Kane tariki 13 Ukuboza 2018 ibiro bya Komisiyo...
13 December 2018 Yasuwe: 3418 0