skol
Kigali
startimes

Tanzania: Wa Mucukuzi w’amabuye y’agaciro yaguye ku rindi ry’imbonekarimwe ryamuhaye miliyoni nyinshi z’amadolari

Amakuru   Yanditswe na: Martin Munezero 4 August 2020 Yasuwe: 2227

Umucukuzi uciriritse wo muri Tanzania, wamenyekanye ubwo bwacyaga abaye umuherwe utunze za miliyoni mu kwezi kwa gatandatu amaze kugurisha amabuye abiri ya Tanzanite kuri miliyoni 3,4 z’amadolari y’Amerika, yagurishije irindi buye kuri miliyoni ebyiri z’amadolari.


Ayo arenga miliyari imwe na miliyoni 900 uyashyize mu mafaranga y’u Rwanda.

Iri ribuye rya gatatu Saniniu Laizer yaguyeho ripima 6,3kg.

Ibuye ry’agaciro rya Tanzanite riboneka gusa mu majyaruguru ya Tanzania. Rikoreshwa mu gukora imitako. Ni rimwe mu mabuye y’imbonekarimwe ku isi.

Impuguke imwe mu bumenyi bw’amabuye y’agaciro avuga ko mu myaka 20 iri imbere aya mabuye ashobora kuzaba yarashizeho burundu ku isi.

Ubwiza bw’iribuye bushingiye ku mabara yaryo atandukanye, arimo icyatsi kibisi, umutuku, ‘violet’ (purple) n’ubururu.

Agaciro karyo kagenwa no kuba imbonekarimwe kwaryo – uko ibara rirushaho kuba ricyeye cyane, ni nako igiciro kiyongera.

Laizer yagiriye inama abacukuzi baciriritse bagenzi be kujya bakorana na leta, avuga ko ibyamubayeho bikwiye kubabera urugero rwiza.

Mu muhango wabereye ku kirombe cya Mirerani mu majyaruguru y’igihugu, yagize ati: “Kugurisha na leta bivuze ko nta kunyura ku ruhande… bakorera mu mucyo”.

Abacukuzi gakondo bakunze kwinubira ko batinda guhembwa na ba nyir’ibirombe, nkuko bivugwa n’umunyamakuru wa BBC Aboubakar Famau uri mu murwa mukuru Dodoma.

Mu kwezi kwa gatandatu ubwo yagwaga ku mabuye abiri nk’ayo rimwe ripima 9,2kg n’irindi ripima 5,8kg, Bwana Laizer ufite abana barenga 30 yabwiye BBC ko azakoresha umunsi mukuru.

Ariko ku munsi w’ejo ku wa mbere, yavuze ko azakoresha ayo mafaranga mu kubaka ishuri n’ikigo nderabuzima mu gace atuyemo ka Simanjiro mu karere ka Manyara.

Mu mezi abiri ashize, yabwiye BBC ko ubwo bukire butazahindura uburyo asanzwe abayeho, ndetse ko azakomeza kwita ku nka ze 2,000.

Icyo gihe yongeyeho ko adakeneye kwigengesera ko hashobora kuba hagira abamusagarira kubera ubwo bukire bwe.

Abacukuzi bato bato nka Bwana Laizer bahabwa uruhushya na leta rwo gukora akazi kabo ko gushakisha Tanzanite, ariko ubucukuzi bunyuranyije n’amategeko bukunze kugaragara hafi y’ibirombe bya za kompanyi nini.

Mu mwaka wa 2017, Perezida John Magufuli yategetse igisirikare kubaka uruzitiro rwa kilometero 24 rwo gukikiza ikirombe cya Merelani cyo mu karere ka Manyara.

Icyo kirombe byemezwa ko ari cyo kimwe rukumbi ku isi kirimo Tanzanite.

Mu mwaka wakurikiyeho, mu 2018, amafaranga yinjizwa na leta ya Tanzania mu rwego rw’ubucukuzi yariyongereye, leta ivuga ko urwo ruzitiro rwabigizemo uruhare.

BBC

Author : Martin Munezero

Munezero Martin ni Umwanditsi w’Ikinyamakuru Umuryango. Yatangiye gukorera iki kinyamakuru muri Nzeli 2014.

Imbuga nkoranyambaga ze:

Instagram:Martin Promoter
Facebook:Munezero Martin
Twitter :Martin Promoter

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Abatunze za Miliyari z’amafaranga basabwe kugoboka abakomeje kwibasirwa...

Ku wa Kane tariki ya 17 Nzeri 2020, Umuyobozi w’ishami rya ONU rishinzwe...
19 September 2020 Yasuwe: 384 0

Kenya yakemuye amakimbirane yari ifitanye na Tanzania yari ashingiye kuri...

Leta ya Kenya yaraye yongereye Tanzania ku rutonde rw’ibihugu abagenzi...
16 September 2020 Yasuwe: 589 0

Tanzania na Uganda bumvikanye ku muyoboro utwara ibitoro wa miliyari...

Abategetsi ba Tanzania na Uganda bumvikanye ku masezerano yo kubaka...
14 September 2020 Yasuwe: 1179 0

Akon yavuze igihe umujyi wa ’Akon City’ uzatangira kubakwa

Akon, umuhanzi w’injyana ya R&B wo muri Amerika, kuva mu 2018 yavugaga...
2 September 2020 Yasuwe: 837 0

Tanzania: Wa Mucukuzi w’amabuye y’agaciro yaguye ku rindi ry’imbonekarimwe...

Umucukuzi uciriritse wo muri Tanzania, wamenyekanye ubwo bwacyaga abaye...
4 August 2020 Yasuwe: 2227 0

Francois Kanimba wayoboye Bank Nkuru y’u Rwanda yahawe akazi gashya muri...

Francois Kanimba izina ryamenyekanye cyane ubwo yayoboraga Banki Nkuru y’u...
3 August 2020 Yasuwe: 1587 0