Kuri uyu wa Gatanu taliki ya 27 Werurwe 2020, Minisiteri y’Ubuzima mu Butaliyani yatangaje ko hapfuye abantu 919, iki gihugu kikaba gikomeje kuzahazwa n’icyorezo cya Coronavirus, aho kimaze kugira umubare munini w’abahitanwa n’iki cyorezo kuruta ibindi bihugu byose ku isi.

Sponsored Ad

Ubutaliyani buri ku mwanya wa kabiri mu bimaze kugira umubare munini w’abanduye COVID-19 kandi kikaza ari icya gatatu aho ubwandu buri kwiyongera cyane, nyuma ya Espagne na Leta Zunze Ubumwe za Amerika.

Nyuma yo kubona ubukana iki cyorezo gifite, u Butaliyani bwashyizeho ingamba zikomeye, bwizeye ko hari icyo bizagabanya ku bukana bwacyo.

Gusa imibare iri kugaragara ubu nta cyizere itanga, cyane ko n’abakozi basaga 3000 bo mu nzego z’ubuzima bamaze kwandura ndetse hakaba hari n’abamaze guhitanwa n’iki cyorezo.

Kugeza ubu Leta Zunze Ubumwe za Amerika ni zo zifite abantu benshi banduye, aho hari kubarurwa hafi ibihumbi 94 500, mu gihe abapfuye bagera ku 1 429.

U Butaliyani ni ubwa kabiri aho bumaze kugira abanduye hafi 86 500, mu gihe abapfuye ari 9 134, bikigira igihugu kimaze gupfusha benshi.

Mu Bushinwa aho iki cyorezo cyatangiriye, harabarurwa abanduye basaga 81 340, mu gihe abapfuye ari 3 292. Ikindi gihugu gikomeje kugira abahitanwa na COVID-19 benshi ni Espagne imaze kugira abanduye 64 059 mu gihe abamaze gupfa ari 4 934.