addresiya
Kigali
startimes

Abarenga 40 bapfiriye mu nkongi y’umuriro yo mu ruganda rwo mu mugi wa New Delhi

Amakuru   Yanditswe na: Dusingizimana Remy 8 December 2019 Yasuwe: 1003

Inkongi y’umuriro yibasiye uruganda rukora ibikapu rwo mu murwa mukuru Delhi w’Ubuhinde yica abakozi 43, nkuko abategetsi babivuga.



Mu rukerera rwo kuri iki cyumweru, iyo nkongi y’umuriro yadutse muri iyo nyubako y’uruganda y’amagorofa ane iri mu gace gashaje kandi karimo ubucucike.

Abantu bagera ku 100 bari baryamye muri urwo ruganda, ahanini rukora ibikapu by’abanyeshuri, ubwo uwo muriro watangiraga. Abantu barenga 60 barokowe muri uwo muriro.

Minisitiri w’intebe w’Ubuhinde Narendra Modi yavuze ko uwo muriro uteye "ubwoba bwinshi" ndetse yihanganisha imiryango yabuze abayo.

Abakora ibikorwa by’ubutabazi bwo kuzimya inkongi [ba kizimyamwoto] bamenyeshejwe bwa mbere iby’uwo muriro ku isaha ya saa kumi n’imwe n’iminota 22 yaho kuri iki cyumweru.

Uwo muriro watangiriye ku magorofa yo hasi, uhita ukwirakwira byihuse ku igorofa rya gatatu aho abakozi bari baryamye.

Agace urwo ruganda ruherereyemo ka Azad Market gafite uduhanda twinshi dufunganye, bikaba byagoranye kuhagera.

Abakora mu bikorwa by’ubutabazi byabasabye kwikorera ku ntugu abazize n’abakozweho n’iyo nkongi, buri muntu umwe umwe.

Impamvu yateye uwo muriro ntiramenyekana, ariko hategetswe ko hatangira iperereza. Umwe mu babibonye yavuze ko byatewe n’ikibazo cy’umuriro mwinshi mu nsinga z’amashanyarazi.

Abakomeretse ubu bari kuvurirwa mu bitaro by’aho i Delhi.

Benewabo n’abagizweho ingaruka n’iyo nkongi bakomeje kurwana no gushakisha amakuru ajyanye n’ababo.

Umugabo umwe yabwiye ibiro ntaramakuru PTI byo mu Buhinde ko umuvandimwe we yari muri iyo nyubako.

Ati: "Nahamagawe kuri telefone n’inshuti ye imbwira ko yakomerekeye mu byabaye. Ntabwo nzi ibitaro yajyanywemo".

Imijyi yo mu Buhinde akenshi yakunze kwibasirwa n’inkongi zitwara ubuzima bw’abantu, hagashyirwa mu majwi itegurwa nabi ry’ibishushanyo mbonera by’ubwubatsi no kujenjeka mu gukurikiza amabwiriza ajyanye n’umutekano nk’impamvu zibitera z’ingenzi.

Abanyapolitiki bo mu Buhinde bakomeje kugaragaza ubwoba bwinshi batewe n’uwo muriro.

Minisitiri w’intebe Modi yatangaje ubutumwa ku rubuga rwa Twitter agira ati: "Umuriro wo mu gace ka Anaj Mandi i Delhi ku muhanda wa Rani Jhansi uteye ubwoba bikomeye".

Nifatanyije n’ababuze ababo. Nifurije abakomeretse koroherwa vuba. Abategetsi bari gutanga ubufasha bwose bushoboka mu gace kabereyemo ibyo byago".

Minisitiri w’ubutegetsi bw’igihugu Amit Shah yavuze ko ibyabaye ari "ibura ribabaje ry’ubuzima bw’agaciro gakomeye".

Inkuru ya BBC

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?
    Log in

    Amategeko n'amabwiriza birkurikizwa


Inzindi nkuru

Tanzania yatangaje ko isigaranye abarwayi 4 gusa ba Coronavirus

Minisitiri w’ubuzima wa Tanzania yatangaje ko umubare w’abarwayi ba Covid-19...
2 June 2020 Yasuwe: 1424 0

Perezida Museveni yasubitse Ifungurwa ry’amashuri kubera Coronavirus

Perezida Yoweri Museveni wa Uganda yasubitseho ukundi kwezi gahunda yo...
2 June 2020 Yasuwe: 1401 0

DR Congo: Ebola yahitanye abantu bane mu gace kitwa Mbandaka

Hemejwe ko habonetse abantu bashya banduye indwara ya Ebola muri Repubulika...
2 June 2020 Yasuwe: 300 0

Afurika y’Epfo: Ibyishimo byarenze abakunzi b’agasembuye baraye ijoro...

Imirongo miremire yabonetse imbere y’inzu zicuruza inzoga muri Afurika...
1 June 2020 Yasuwe: 2227 0

Ibyaranze iminota 30 ya nyuma y’ubuzima bwa George Floyd wahagaritse ubuzima...

Ubuzima busa n’ubwahagaze muri Leta Zunze Ubumwe z’Amerika kubera...
31 May 2020 Yasuwe: 5413 0

Igikomangoma cy’Ububiligi cyanduriye Coronavirus mu birori cyitabiriye mu...

Igikomangoma cyo mu Bubiligi cyanduye coronavirus nyuma yo kwitabira...
31 May 2020 Yasuwe: 708 0