Mu gihe Perezida Magufuli akomeje gahunda ye yo kudafunga insengero n’andi makoraniro ahuza abantu benshi,mu masaha 24 ashize muri Tanzania niho habonetse abanduye benshi bashya, 35. Byatangajwe na minisiteri y’ubuzima yaho.

Sponsored Ad

Aba baje biyongera kuri 14 babonetse tariki ya 13 Mata 2020. Ibi byatumye abamaze kuyandura baba 88 nubwo Leta yanze guhagarika amateraniro ahuza abantu.

Ku cyumweru gishize, ikigo gishinzwe ingendo zo mu kirere (TCAA) cyatangaje ko cyahagaritse indege zose zitwara abantu binjira muri icyo gihugu.

Itangazo ryasohowe n’ikigo TCAA rivuga ko indege zemerewe kwinjira muri icyo gihugu ari izitwara imizigo gusa.

Ryongeyeho riti: "Abapilote n’abandi bakozi bose bo muri izo ndege bazabanza gushyirwa mu bigo byateguwe na leta byo gushyira mu kato abikwa ko banduye kandi bazimenyera ibibatunga".

Iyi ngingo ifashwe mu gihe leta ya Tanzania inegurwa n’abahanga batari bake hamwe n’ibitangazamakuru mpuzamahanga bimwe na bimwe ku buryo ifatana uburemere buke iki cyorezo.

Ingamba za Perezida John Magufuli zo kudafunga insengero zanenzwe na benshi muri iki gihe ibihugu byinshi byahagaritse amakoraniro ahuza abantu harimo insengero,utubari,amasitade n’ibindi bihuza benshi.

Kuwa 22 Werurwe 2020,Perezida John Pombe Magufuli wa Tanzania,yasabye abaturage b’iki gihugu kudatinya kujya gusenga ngo kuko ngo mu nsengero ariho hari umuti nyawo wa coronavirus.

Perezida Magufuli yari mu misa muri kiliziya ya Mutagatifu Paulo mu mujyi wa Dodoma aho yasabye Abatanzaniya kutagira ubwoba.

Magufuli yagize ati: "Ntidutinye kujya gushima no gusenga Imana buri wese mu kwemera kwe, niyo mpamvu nka leta tutafunze aho gusengera mu misigiti cyangwa amakanisa kuko tuzi neza ko aho mu misigiti no mu makanisa ariho hari umuti w’ukuri.

"Aho niho hari Imana, niyo mpamvu nanjye kuza hano ntabitinye, corona uwo ni shitani ntabwo ashobora kwicara mu mubiri wa Yesu azaba yamaze gupfira aho kure".

Ibyavuzwe na perezida Magufuli bamwe bagaragaje ko ari ugushyira igihugu mu kaga kuko hari aho byagaragaye ko nyuma y’amahuriro y’abantu benshi virus ya Covid-19 ihita yiyongera.

Abamaze kwandura iyi ndwara ku isi ubu bararenga miliyoni ebyiri(2) nkuko bivugwa na kaminuza y’ubushakashatsi ya Johns Hopkins.

Kuri uyu wa gatatu ishami rishinzwe kurwanya ibyorezo mu muryango w’Ubumwe bwa Africa rivuga ko abanduye Covid-19 muri Africa ari 16,285. Hiyongereyeho abantu 1,036 ugereranyije n’ejo.

Iri shami rivuga ko imaze kwica abantu 874 (58 bashya ugereranyije n’ejo) naho 3,142 bayikize (247 bashya ugereranyije n’ejo).

Muri aka karere uko abayanduye bahagaze;

DR Congo – 254 (13 bashya uyu munsi)
Kenya – 225 (9 bashya uyu munsi)
Rwanda – 136 (2 bashya uyu munsi)
Tanzania – 88 (35 bashya uyu munsi)
Uganda – 55 ( 1 mushya uyu munsi)
Burundi – 5 (nta bashyashya uyu munsi)
Sudan y’Epfo – 4 (nta bashyashya uyu munsi)