Igisirikare cya Irani cyemeje ko cyarashe "kitabishaka" ya ndege ya Ukraine yari itwaye abagenzi 176, nk’uko bivugwa na televiziyo ya leta ya Irani.

Sponsored Ad

Iryo tangazo rivuga ko "habayeho kwibeshya" nyuma y’aho iyo ndege yarimo igenda hejuru hafi y’ikigo cy’ingabo zishinzwe kurinda ubutegetsi bwa kislamu, bayirasa bazi ko barashe indege ya Amerika yari ije kubarasa.

Irani yari yahakanye ibyavugwaga ko imwe muri misile zayo ariyo yarashe iyi ndege hafi y’umurwa mukuru, Tehran, ku wa gatatu.

Amakuru yavuye mu iperereza rya Amerika na Canada yakomeje kwerekana ko Irani ariyo yarashe iyo ndege, bitewe no kwibeshya.

Iyi ndege ya kompanyi ya Ukraine yarashwe nyuma y’amasaha make Irani iteye ibisasu bya misile ku birindiro bibiri by’ingabo za Amerika muri Iraq.Abagenzi 176 bari bayirimo nta n’umwe warokotse.

Irani yateye ibyo bisasu mu guhorera umuyobozi mukuru mu gisirikare cya Irani,Gen.Qasem Soleimani wishwe na drone y’abanyamerika ku wa 03 Mutarama 2020.

Ibinyamakuru bya Amerika byatangaje ko Irani yarashe iyo ndege yibeshye kuko yaketse ko Amerika ishobora kubasubiza kuri ibyo bitero yari imaze kugaba.

Abicishije kuri Twitter kuri uyu wa Gatandatu, Minisitiri w’Ububanyi n’Amahanga wa Irani, Mohammad Javad Zarif, yavuze ko "imyitwarire ya Amerika" ariyo yatumye iyo ndege iraswa.

Kuwa Kane, amashusho yagaragaye kuri televiziyo aturutse aho impanuka yabereye, yerekanye ko hari misile yarashe iyi ndege ya Ukraine gusa Irani yabanje kubihakana.

Ejo ku wa gatanu, Minisitiri w’ububanyi n’amahanga wa Canada Francois-Philippe Champagne yabwiye Irani ko "amahanga arimo arayireba", ndetse ayimenyesha ko imiryango y’ababuze ababo "ikeneye kumenya ukuri".

Mbere y’aho, Minisitiri w’intebe wa Canada, Justin Trudeau, yatangaje ko yabonye amakuru yizewe yemeza ko iyo ndege ishobora kuba yarashwe n’igisasu cya misile cya Irani.

Video yahawe ikinyamakuru The New York Times irasa n’iyerekana igisasu cya misile cyaturikije iyo ndege.

Itangazo Leta ya Irani yashyize hanze rivuga ko abarashe iyo ndege bagomba gukurikiranwa.Yasabye imbabazi ababuriye ababo muri iyi mpanuka kubera amakosa y’abashinzwe ubwirinzi bwayo ndetse ivuga ko bagiye gukosora imikoreshereze ya Systems zayo kugira ngo ikosa nk’iri ntirizongere kubaho.

Inkuru ya BBC