Abantu babiri barimo Armel Ntwari wari uzwi ku izina rya Micomyiza ,Umurundi uri mu kigero cy’imyaka 30 wari impunzi mu Rwanda babasanze bapfiriye mu nzu bakodeshaga mu karere ka Kicukiro mu Mujyi wa Kigali.

Sponsored Ad

Amakuru yamenyekanye kuri uyu wa kabiri ko aba bantu babiri barimo umugore w’umunyarwandakazi hamwe n’ uyu musore w’impunzi uturuka mu Burundi, basanzwe mu nzu bakodeshaga bapfuye.

Abaturanyi babo bavuga ko aba bombi bari basangiye inzoga ku cyumweru barangije bataha ari bazima ariyo mpamvu bo n’abayobozi b’inzego zibanze bakeka ko bombi baba bahawe uburozi.

Uwo mugore yabonetse yapfuye mu ijoro ryo ku wa mbere, mu gihe umusore w’Umurundi we yagaragaye kuri uyu wa kabiri nkuko amakuru dukesha ijwi ry’Amerika abitangaza.

Urupfu rw’uyu musore rwamenyekanye ubwo abaturanyi be bagize amakenga kuko bari bamaze iminsi 2 adasohoka, niko kumena umuryango basanga umurambo we mu nzu. Bahise bahamagara inzego z’umutekano.

Urwego rw’Igihugu rw’ubugenzacyaha RIB rwemeje ayo makuru rutangaza ko rwatangiye iperereza kugira ngo hamenyekane icyishe abo bantu.

Uyobora komite y’impunzi muri Kigali, yihanangirije impunzi kutongera gusohoka rwihishwa muri iki gihe Leta y’u Rwanda yasabye abantu kuguma mu ngo zabo mu kwirinda coronavirus.