Perezida wa Madagascar yatangaje ko iki gihugu kigiye gutangira kugerageza urukingo rwa coronavirus rukoze mu cyatsi cya artemisia.

Sponsored Ad

Perezida Andry Rajoelina yavuze ko iryo gerageza rizatangira mu cyumweru gitaha.

Yashishikarije kandi abaturage ba Madagascar gutera iki giti cya artemisia.

Bwana Rajoelina yavuze ko ari kuvugana n’abahanga muri siyansi bo muri Amerika bazafasha muri ubwo bushakashatsi.

Artemisia niyo yakozwemo umuti witwa Covid-Organics, Perezida Rajoelina akaba yavuze ko iki gihugu kiri gusaba ishami rya ONU rishinzwe ubuzima ku isi, OMS/WHO, ngo ryemeze uwo muti.

Mu itangazo WHO yoherereje BBC, ivuga ko itaremera "uburyo bwo kwivura hakoreshejwe imiti iyo ariyo yose...mu gukingira cyangwa kuvura Covid-19".

Covid-Organics, umuti wakozwe muri Madagascar umaze koherezwa mu bindi bihugu bya Afurika byawutumije birimo Guinea-Bissau na Equatorial Guinea.

Perezida John Magufuli wa Tanzania nawe yavuze ko bazohereza indege muri Madagascar ikabazanira kuri uwo muti.

Leta zunze ubumwe za Amerika, ziheruka kwemeza umuti witwa remdesivir - ubundi wakorewe kuvura Ebola - ko ari umuti wakoreshwa mu kuvura Covid-19.

Kugeza ubu, iki cyorezo nta muti wemewe n’urwego rushinzwe ubuzima ku isi uraboneka.

Inzego zishinzwe ubuzima ku isi no muri Afurika ntacyo ziratanga kuri uyu muti watangajwe na Bwana Rajoelina.

Ishami ry’umuryango w’abibumbye ryita ku buzima, OMS, kugeza ubu nta muti riratangaza wakorewe ubushakashatsi uvura Covid-19.

Ku kigo Malagasy Institute of Applied Research (IMRA) cyakoze uwo muti unyobwa, imbere y’abaminisitiri, abadipolomate n’abanayamakuru Rajoelina yagize ati:

"Twakoze isuzuma - abantu babiri ubu bakijijwe n’uyu muti.

"Iki ni icyayi cy’ibyatsi kivura mu minsi irindwi".

Mu kuwushimangira yagize ati: "Ninjye wa mbere uri buwunywe uyu munsi imbere yanyu, mubone ko ukiza kandi utica".

Uyu muti wiswe Covid-Organics, ukozwe mu byatsi byitwa Artemisia - umuti byemejwe ko bikoreshwa mu kuvura Malaria - hamwe n’ibintu byatsi gakondo nk’uko ikigo IMRA kibivuga.

Ubuziranenge bwawo no kuba uvura Covid-19 koko ntabwo biragenzurwa ku rwego mpuzamahanga, nta mibare kandi itangwa n’ubushakashatsi bw’uko wageragejwe.

Abahanga muri siyansi bakomeje kuburira abantu ingaruka mbi bashobora guterwa no gukoresha imiti inyobwa itarapimwe ikozwe mu byatsi .

Bwana Rajoelina ibyo abishyira ku ruhande, avuga ko uwo muti uzahabwa abana b’abanyeshuri mu gihugu kuko ari "inshingano ye kurengera abaturage ba Madagascar".