Abayobozi ba Uganda basabye ko udukingirizo duherutse gutangwa incuro ebyiri n’ishyirahamwe Marie Stopes Uganda rishinzwe kwita ku buzima bw’abantu ko twagarurwa vuba na bwangu kuko tutujuje ubuziranenge.

Sponsored Ad

Itangazo ryasohowe na muganga Carole Sekimpi,uyobora Marie Stopes, rigira riti: "Turabizi ko udukingirizo twa Life Guard twujuje ibisabwa n’amategeko,ariko utwatanzwe inshuro 2 ziheruka ntitwujuje ubuziranenge dusaba".

Ikinyamakuru Daily Monitor cyavuze ko utwo dukingirizo twasohotse tungana na miliyoni enye.

Ikigo gishinzwe imiti muri Uganda (NDA) cyasohoye urwandiko mu kwezi gushize kivuga ko ibipimo byerekana ko hari ibimenyetso bigaragaza ko utwo dukingirizo dushobora guturika.

Muri urwo rwandiko, Victoria Nambasa, ushinzwe kugenzura ko imiti yujuje ibisabwa n’amategeko muri icyo kigo yanditse ati:

"Tubahaye ibyumweru 2 kugira ngo mutwereke uburyo muzakura utwo dukingirizo mu bantu n’abakiriya bazaba batuguze".

Imibare itangwa na Minisiteri y’ubuzima muri Uganda ivuga ko udukingirizo hafi miliyoni 800 ari two dukenewe kugira ngo birinde inda zitifuzwa, SIDA n’indwara zandurira mu mibonano mpuzabitsina.

Inkuru ya BBC