Kigali
dnd

Uganda: Umunyarwanda yatemwe na shebuja w’Umugande amuziza kumwishyuza amafaranga yakoreye

Amakuru   Yanditswe na: Dusingizimana Remy 25 November 2019 Yasuwe: 2654

Umunyarwanda witwa Karemera Damascène w’imyaka 25 ukomoka mu Murenge wa Busoro, AKarere ka Nyanza, mu Ntara y’Amajyepfo, yatemwe ukuboko no mu mutwe n’umunya-Uganda, yakoreraga mu buhinzi bw’urutoki.



Uyu Karemera yatemwe n’uyu munya Uganda amuziza ko amwishyuje amafaranga yari amufitiye angana n’ibihumbi 192 by’amashilingi ya Uganda akaba ari umushahara w’amezi atandatu.

Karemera avuga ko yari amaze amezi umunani aba muri iki gihugu cy’igituranyi, aho yakoraga mu rutoki rw’umwe mu baturage bo mu Karere ka Ntungamo.

Yamuhembaga amashilingi ibihumbi 32 buri kwezi, akaba yaramugezemo amezi atandatu aho yamubwiraga ko azayamuhera rimwe umunsi yayashatse.

Tariki 23 Ugushyingo saa yine z’igitondo ngo nibwo yamubwiye ko aje kumwishyura aza ari kumwe n’abandi banya-Uganda batatu, aho kumwishyura bakurayo umuhoro batangira kumutema ngo bamwice aho bamubwiraga ko ari maneko y’u Rwanda.

Icyakora ntabwo babashije kubigeraho kuko bamutemye ku kuboko no ku mutwe ubundi akiruka akabasiga.

Umuvugizi wa Polisi mu Ntara y’Iburasirazuba CIP Twizeyimana Hamdun, yabwiye IGIHE dukesha iyi nkuru ko uwo munyarwanda yaturutse muri Uganda avirirana bagahita bamujyana kwa muganga.

Yagize ati “Yambukiye mu nzira y’amazi Kagitumba ahita ajya kuri Polisi bamutwara ku Kigo Nderabuzima kumuvuza, bamudoze kuri icyo gikomere cyo mu mutwe ndetse n’akaboko ubu ameze neza nubwo yaje avirirana hasigaye kumujyana iwabo.”

CIP Twizeyimana yasabye abanyarwanda kwitondera kujya muri Uganda ngo kuko benshi bajyayo bahohoterwa.

Ati “Abanyarwanda bakwiye kurinda umutekano wabo bakumva ko Uganda abanyarwanda bajyayo babahohotera, bakwiye kugabanya ingendo bakorerayo kugeza igihe inzego z’igihugu zibifite mu nshingano zizumvikanira wenda umutekano ukagaruka ku banyarwanda.”

Uganda imaze igihe kinini ihohotera abanyarwanda baba muri iki gihugu bamwe bakaba bafungwa bazira ubusa, abandi bakicwa abandi bakameneshwa bazira ko ari abanyarwanda.

Mu biganiro bikomeje guhuza intumwa z’u Rwanda na Uganda, ibiheruka kubera i Kigali byemeje ko Uganda igenzura abanyarwanda bafunzwe nta dosiye, bakarekurwa.

Biteganyijwe ko mu nama itaha izabera muri Uganda [nubwo ikomeje guhindagurirwa amatariki izaberaho], hazarebwa niba hari intambwe yatewe, mbere yo kuganira ku bijyanye n’urujya n’uruza hagati y’ibihugu byombi.

Guhohoterwa no gufungwa kwa hato na hato kw’abanyarwanda muri Uganda, kwatumye mu ntangiriro z’uyu mwaka, Guverinoma y’u Rwanda isaba abaturage kuba bahagaritse kujya muri Uganda kugeza igihe ikibazo kizakemukira.

Inkuru ya IGIHE

Ifoto:Internet

Author : Dusingizimana Remy

Ibitecyerezo

  • Log in

    Amategeko n'amabwiriza birkurikizwa


Inzindi nkuru

Papa Benedict XVI yanenze mugenzi we Papa Francis wamusimbuye kubera...

Papa Benedict XVI wacyuye igihe yatangaje ko adashyigikiye ibyo koroshya...
13 January 2020 Yasuwe: 2532 1

Abanya Nigeria bibasiye Perezida wabo Buhari wamereye umukobwa we gukoresha...

Benshi mu baturage bo muri Nigeria banenze perezida wabo Muhammadu Buhari...
13 January 2020 Yasuwe: 3434 0

Iran yashyize yemera ko yarashe itabishaka indege ya Ukraine yaguyemo...

Igisirikare cya Irani cyemeje ko cyarashe "kitabishaka" ya ndege ya Ukraine...
11 January 2020 Yasuwe: 2414 0

Iran yavuze ko itarashe indege itwara abagenzi ya Ukraine

Abayobozi bo mu burengerazuba bw’isi baravuga ko hari ibimenyetso bigaragaza...
10 January 2020 Yasuwe: 1428 0

Australia: Abayobozi basabye abaturage ibihumbi 500 guta ingo zabo...

Abayobozi ba Australia barasaba abaturage bagera ku bihumbi magana atanu...
10 January 2020 Yasuwe: 2639 1

Byagaragaye ko ya ndege ya Ukraine iherutse guhitana abantu 176 yarashwe na...

Amashusho yagaragajwe mu binyamakuru yerekanye ko ya ndege ya Ukraine...
10 January 2020 Yasuwe: 2882 0