Polisi ya leta ya California yatangaje ko harashwe abantu batandatu bagakomereka ubwo bari mu birori birimo abantu benshi mu gihe hari amategeko ko abantu baguma mu ngo zabo mu kwirinda ikwirakwira rya coronavirus.

Sponsored Ad

Aba bantu barashwe kuwa gatandatu nijoro ubwo bari mu birori ku nzu zo guturamo (apartment) ahitwa Bakersfield.

Abarashwe ni abagore bane, umugabo umwe n’umukobwa umwe - bakaba baravuwe ibikomere bidakomeye cyane.

Nta muntu wafashwe ngo afungwe, gusa abagabo bane babonywe bahunga n’imodoka bikekwa ko ari bo bakoze iki gitero.

Hari gukorwa iperereza nk’uko polisi yaho ibitangaza

Mu kwezi gushize, muri leta ya California hashyizweho amabwiriza abuza abantu kuva mu ngo zabo.

Iyi ni imwe muri leta zibasiwe cyane na coronavirus muri Amerika aho abantu barenga 21,000 bayanduye naho 651 ikaba imaze kubahitana.

Mu mategeko mashya, abatuye muri iyi leta bemerewe gusohoka gusa bagiye guhaha, kwivuza, gukora siporo cyangwa kugendesha imbwa zabo n’amaguru.

Ibikorwa byose byarafunzwe hemererwa ibikenerwa cyane nk’ubucuruzi bw’ibiribwa, ubw’imiti n’abacuruza ibitoro.

Leta Zunze Ubumwe za Amerika zageze ku mwanya wa mbere kuri iki cyumweru mu bihugu bimaze gupfusha abantu benshi ku Isi, kuko ubu habarurwa abarenga ibihumbi 21 bamaze guhitanwa na Coronavirus.

Uyu mubare ushobora gukomeza kwiyongera mu minsi iri imbere, kuko habarurwa ko muri iki gihugu honyine, hashobora gupfa abari hagati y’ibihumbi 100 na 240.

Kuwa 11 Mata 2020,Kaminuza ya Johns Hopkins yatangaje ko abantu 2,108 bishwe na coronavirus mu masaha 24 yari ashize,bituma iki gihugu gica agahigo ko kugira umubare munini w’abantu benshi cyane bapfuye ku munsi umwe.

Perezida Donald Trump yavuze ko yiteze kuzabona umubare w’abicwa na coronavirus muri USA ugabanuka ukaba munsi y’impfu 100,000 zateganywaga ku ikubitiro.

Abashakashatsi bateganyaga ko umubare w’abicwa na coronavirus muri Amerika uzagera ku kigero cyawo cyo hejuru cyane ku wa gatanu w’iki cyumweru, hanyuma buhoro buhoro ugatangira kugenda ugabanuka.

Abo bashakashatsi bateganya ko ku itariki ya mbere y’ukwa gatanu wagabanuka ukagera ku bantu barenga 970 bapfa ku munsi.

Ku itariki ya mbere Gicurasi 2020 niwo munsi abategetsi ba USA batanzeho igitekerezo ko ari ho urwego rw’ubukungu rwatangira kongera gukora.