Umunyaamakuru witwa Zororo Makamba w’imyaka 30 yahitanywe na Coronavirus yamufashe kuwa Gatandatu w’icyumweru gishize,bamugejeje kwa muganga ntiyabasha kurokoka.

Sponsored Ad

Urupfu rwa Zororo Makamba rwashimangiye ko icyorezo cya COVID-19 kitica abantu bakuze gusa nkuko byavugwaga ko n’abakiri bato badafite ubudahangarwa bwacyo.

Makamba yari umunyamakuru uzwi cyane ndetse yakomokaga mu muryango ukize kuko se yari umucuruzi ukomeye.Amakuru avuga ko uyu munyamakuru yaba yarakuye Coronavirus muri Amerika cyane ko yageze muri Afurika y’Epfo avuye New York kuwa 09 werurwe uyu mwaka.

Makamba yasanganywe Coronavirus kuwa Gatandatu w’icyumweru gishize,ahita aremba cyane nyuma yo kujyanwa mu bitaro byita ku barwayi ba Coronavirus mu mujyi wa Harare.

Byabanje gutangazwa ko uyu munyamakuru ameze neza aho yari yashyizwe mu kato ariko byarangiye ahitanywe na COVID-19.Yabaye umuntu wa mbere muri Zimbabwe uhitanywe na Coronavirus.

Bamwe baremeza ko igihugu cya Zimbabwe kidafite ibikoresho bihagije byo guhangana n’iki cyorezo nubwo abamaze kwandura ari bake.

Zimbabwe ngo ifite imiti mike igabanya uburibwe,uturindantoki n’udupfukamunwa,utwuma dufasha guhumeka ndetse n’utwongerera umuntu umwuka.

Zimbabwe yabujije abantu guhurira mu materaniro n’amanama atandukanye ahuza abantu mu rwego rwo kwirinda ko Coronavirus yakwirakwira.