Imitwe y’abitwaje intwaro yateye gereza nkuru mu murwa mukuru wa Haiti, Port-au-Prince, bafungura imfungwa.

Sponsored Ad

Umunyamakuru wo muri icyo gihugu yabwiye BBC ko igice kinini cy’izi mfungwa zisaga 4000 zatorotse.

Mu batorotse harimo abari muri iyi mitwe y’abagizi ba nabi bagize uruhare mwu kwica Perezida Jovenel Moïse mu 2021.

Kuva mu myaka mike ishize, imyiryane muri iki gihugu cya mbere gikenye ku mugabane wa Amerika yariyongereye.

Imitwe yitwaje intwaro ifite intumbero yo kwica Minisitiri w’intebe Ariel Henry igenzura 80% by’umurwa mukuru Port-au-Prince.

Ibintu byasubiye kuba bibi ku wa kane ubwo Minisitiri w’intebe yafataga urugendo rwerekeza i Nairobi ku kibazo cyo kohereza ingabo mpuzamahanga zizaba ziyobowe na Kenya muri Haiti.

Umwe mu bakuru b’imitwe yitwaje intwaro Jimmy Chérizier (azwi ku ritazirano rya "Barbecue") yatangaje ko igitero giteguwe neza cyo kumwica.

"Twese hamwe, imitwe yitwaje intwaro mu mijyi yo mu ntara zo hagati mu gihugu hamwe n’iyo mu murwa mukuru, twunze ubumwe", niko uyu wahoze ari umuyobozi mu gipolisi avuga, akaba azwi ko ari inyuma y’ubwicanyi butari buke mu murwa mukuru Port-au-Prince.

Mu kurasana kwabaye, abapolisi bane bahasize ubuzima abandi batanu nabo barakomereka.Ambasade y’Ubufaransa muri Haiti isaba abantu kwirinda ingendo hagati no mu nkengero z’umurwa mukuru.

Igipolisi cyo muri Haiti gisaba igisirikare gufasha gukomeza umutekano ku magereza, ariko iyi gereza yatewe ku wa gatandatu.

Ejo ku cyumweru, imiryango y’iyi yari igifunguye kandi nta n’umwe wari uhari mu bashinzwe umutekano, nk’uko bivugwa n’ibiro ntaramakuru Reuters.

Itangaza ko abantu batatu bagerageje gutoroka bari barambaraye hasi bapfuye.

BBC