skol
fortebet

Burundi: Imbonerakure zagabye igitero ku baturage bo mu Kayanza zikomeretsa benshi

Yanditswe: Friday 10, Apr 2020

Sponsored Ad

Abaturage bo muri komine Butaganzwa mu ntara ya Kayanza ku mutumba witwa Mufumya bavuga ko batewe n’igitero kinini cy’Imbonerakure zigakubita abantu benshi zikanabomora ibiro by’ishyaka CNL kuri uwo mutumba.

Sponsored Ad

Umwe mu baturage wabonye iki gitero kuri uyu mutumba avuga ko cyabaye mu gitondo ejo kuwa kane, aho bamwe mu baturage bakubiswe bajyanywe kwa muganga kubera ibikomere.

Raporo zitandukanye z’imiryango mpuzamahanga zivuga uyu mutwe w’urubyiruko rw’ishyaka riri ku butegetsi CNDD-FDD, mu bikorwa by’urugomo cyangwa ubwicanyi ku batari muri iri shyaka.

BBC yagerageje kuvugana n’utegeka komine Butaganzwa, umuvugizi w’igipolisi polisi n’umuvugizi bw’ishyaka CNDD-FDD ntibyashoboka kugeza ubu.

Utwara Intara ya Kayanza aho urwo rugomo ruvugwa, yabwiye BBC ko ayo makuru yabazwa muri iryo shyaka aho kuyabaza we.

Umuturage utifuje kuvugwa amazina ye yabwiye BBC ko iki gitero cy’abantu benshi cyari kiyobowe n’abarimo umukuru wa CNDD-FDD muri komine, uwahoze ari mustanteri na ’chef de zone’.

Avuga ko babanje kubomora ingoro y’ishyaka CNL nyuma bakajya ku nzu z’abantu bakazibomora, bagakubita abantu ndetse bamwe bakabambura ibyabo.

Ati: "Hari abantu babiri batwaye amafaranga na telephone zabo, hari uwo batwaye ibihumbi 250 na telephone, undi bamutwara ibihumbi 60 na telephone".

Babahoye iki?

Uyu agira ati: "Baje bafata abantu babawira ngo nibajye ahari kubera inama ya CNDD-FDD abandi bababwira ko batari muri iryo shyaka".

Iki gitero avuga ko cyahagaritswe na polisi yaje igahamara abo bari bakiyoboye bakababuza gukomeza urugomo. Avuga ko atazi niba abo bakurikiranywe.

Muri iki gitero avuga ko hakubiswe abantu benshi, akavuga ko hari abajyanywe mu bitaro kuko bakomeretse bikabije.

Nancy Ninette Mutoni umuvugizi w’ishyaka CNDD-FDD yabwiye BBC ko hari ihuriro ryashyizweho rihuza amashyaka yose ryigirwamo ibibazo byose nk’ibyo, kandi bikamenyeshwa ubutegetsi.

Madamu Mutoni avuga ko ibibazo byose by’abanywanyi b’amashyaka biganirwa muri iryo huriro ryayo riba kabiri mu kwezi mu Ntara no muri za komine

Madamu Mutoni ati: "Twebwe nk’umugambwe ntacyo twavuga ku bintu biri hariya, ibyo bireba ubutegetsi bwaho ntabwo turi ’parti-état’ hariho ubutegetsi.

Ibibazo bijyanye n’umutekano w’abaturage bibazwa leta, ntabwo bibazwa ishyaka"

Terance Manirambona umuvugizi w’ishyaka CNL mu Burundi, avuga ko ibikorwa nk’ibi ari ibintu bimaze kurenga urugero.

Avuga ko mu ijoro ryo kuwa gatatu ku mutumba witwa Kigarama muri iyi komine Butaganzwa mu ntara ya Kayanza, Imbonerakure zateye imihana igera kuri itandatu yiganjemo abayoboke ba CNL.

Ati: "Ikibabaje ni uko uno munsi mu gitondo [kuwa kane] ku mutumba wa Mufumya urwo rubyiruko rwateye ingoro y’ishyaka CNL barayibomagura, inzugi n’amadirishya baramena.

"Abayoboke bacu begereye aho hantu nabo hari abagiriwe nabi barakubitwa, tumaze kumenya ko hari abakomeretse bari kwa muganga ndetse ko hari uwakuwe amenyo".

"Ni ibintu bigayitse bikorwa ku manywa izuba riva".

Ntibakurikiranwa n’ubutabera?

Bwana Manirambona avuga ko ibi bikorwa n’abantu baba bazwi ko ari abo mu Imbonerakure ariko kenshi badahanwa cyangwa ngo bakurikiranwe.

Mu gihe mu kwezi gutaha mu Burundi hateganyijwe amatora y’umukuru w’igihugu, Bwana Manirambona avuga ko ibikorwa nk’ibi bigaragaza ko hari abatinya guhiganwa.

Ati: "Ikidutera amakenga ni ukuvuga ngo; none urwo rubuga rwo guhiganiraho mu byiyumviro bya politiki rwaba rumeze neza gute mu gihe hari abantu bari mu ishyaka kanaka bacyumva ko amatora yaba hari umerewe nabi cyangwa bagatera ubwoba abandi ngo ntazagaragaze uwo ashaka gutora".

Inkuru ya BBC

Leave a Reply

Your email address will not be published. Required fields are marked *

Who are you?

Amategeko n'amabwiriza birkurikizwa