Mu ntara ya Bujumbura Rurale habaye imirwano ikomeye ku munsi wo ku cyumweru taliki ya 23 Gashyantare 2020 yahuje inyeshyamba zitwaje intwaro na polisi y’u Burundi bituma benshi bahasiga ubuzima.

Sponsored Ad

Nkuko amafoto yacaracaye ku mbuga nkoranyambaga abigaragaza,izi nyeshyamba zimwe zarafashwe ziricwa aho bivugwa ko zateye aka gace ari 14.

Umuyobozi wa komini Nyabiraba yo mu Burengerazuba bw’u Burundi, yemeje ko muri iyi mirwano hapfiriye inyeshyamba 12 izindi zirafatwa mu gihe umupolisi umwe yishwe, undi arakomereka.

Amakuru avuga ko nta muturage n’umwe wahasize ubuzima uretse umwe wakomeretse.Leta yafashe imbunda 6 z’aba barwanyi.

Izi nyeshyamba uko ari 14 zateye u Burundi ku cyumweru nyuma ya saa sita zicakirana na polisi y’igihugu,zirembejwe zihungira muri Komini Mutambu aho ziciwe.

Abaturage babwiye ikinyamakuru SOS Médias Burundi ko inyeshyamba 3 arizo bamenye aho zituruka mu gihe polisi yo yavuze ko izi nyeshyamba zamaze igihe zihishe mu bihuru no mu gishanga mbere y’uko zigaba igitero kitazihiriye.

Amafoto yagaragaje urubyiruko rwo mu ishyaka rya CNDD-FDD ruzwi nk’Imbonerakure rufashe rwamikono umwe muri izi nyeshyamba ruri kumuhata ibibando.