Abantu barenga 10 bamaze gupfa abarenga 80 barakomereka kuva ejo kuwa kabiri nyuma y’iyicwa ry’umuhanzi ukunzwe ryateje imyigaragambyo mu murwa mukuru wa Ethiopia no mu bice bya Oromiya nk’uko polisi n’abaganga babitangaza.

Sponsored Ad

Ibiri kuba birerekana ubushyamirane mu bakomoye bo mu bwoko bw’aba Oromo, hari bamwe muri bo bari kurwanya ubutegetsi bwa minisitiri w’intebe Abiy Ahmed.

Bwana Abi, iyicwa ry’umuhanzi Haacaaluu Hundeessaa yaryise "igikorwa cya kinyamaswa" mu ijambo yavugiye kuri televiziyo mu ijoro ryo kuwa kabiri.

Yagize ati : "Iki ni igikorwa cyakozwe kandi cyateguwe n’abanzi bo mu gihugu no hanze yacyo bagamije guhungabanya amahoro no kutubuza kugera kubyo twatangiye".

Polisi ivuga ko kuwa mbere saa tatu n’igice z’ijoro Hundeessaa yarashwe agapfa.

Abantu bakekwaho icyo gikorwa barafashwe. Polisi ivuga ko biboneka ko ari umugambi wateguwe.

Mu gitondo ejo kuwa kabiri umurwa mukuru Addis Ababa wahise wuzura imyigaragambyo. Muri uwo mujyi haturitse ibisasu bitatu nk’uko komiseri Endeshaw Tasew wa polisi yabitangaje.

Mu ijambo kuri televiziyo Bwana Tasew yagize ati : "Bamwe mu bateze igisasu nabo barapfuye kimwe n’abandi baharenganiye."

Yanavuze ko hari umupolisi wapfuye mu mirwano n’abashinzwe kurinda Jawar Mohammed, umushoramari mu itangazamakuru akaba n’impirimbanyi ya politiki, ubwo yari agiye gufatwa.

Abiy Ahmed, Jawar, ndetse n’uyu muhanzi wishwe bose ni aba Oromo, ubwoko nyamwinshi muri Ethiopia bwakomeje kuvuga ko bwahejejwe inyuma mu butegetsi n’ubukungu, kugeza mu 2018 Abiy agiye ku butegetsi.

Bwana Jawar, wigeze kuba avuganira cyane Abiy yaje guhinduka ntibavuga rumwe, ejo yatawe muri yombi hamwe na Bekele Gerba, ukuriye ishyaka ry’aba-Oromo ritavuga rumwe n’ubutegetsi nk’uko polisi ibivuga.

Televiziyo ya Bwana Jawar ivuga ko byabaye ngombwa ko itangaza ibiganiro byayo biva muri Leta ya Minnesota muri Amerika bigaca ku cyogajuru (satellite), nyuma y’uko polisi iteye ibiro byayo i Addis igafunga bamwe mu bayikorera.

Jawar, kuwa kabiri yanditse kuri Facebook ati : "Ntabwo bishe Hachalu gusa. Barashe umutima w’igihugu cya Oromo, nanone !!...Mushobora kutwica, twese, ntimushobora kuduhagarika !! NTIBISHOBOKA".

Umuhanzi Haacaaluu yanenze ubutegetsi buriho mu kiganiro yagiranye na televiziyo ya Jawar mu cyumweru gishize.

Imyigaragambyo iri gukwira

Kwica uyu muhanzi byatumye iyi myigaragambyo itangira mu mijyi myinshi y’agace ka Oromia.

Mu mujyi wa Adama, ibitaro byakiriye nibura inkomere 80, nk’uko Dr Mekonnen Feyissa umuganga ubikoraho yabibwiye Reuters.

Uyu muganga avuga ko abenshi bari barashwe, abandi batewe ibyuma cyangwa bakubiswe. Umunani muri bo bapfuye bari kuzanwa ku bitaro nk’uko abivuga.

Imirongo ya telephone ntikora neza, Internet yafunzwe, ingamba abategetsi bafashe na mbere mu bihe nk’ibi byo kwigaragambya.

Umuhanzi w’impinduramatwara

Indirimbo za Haacaaluu zarakoreshwaga cyane mu myigaragambyo yaje kurangira Abiy Ahmed ageze ku butegetsi mu 2018.

Bwana Haacaaluu wigeze kuba imfungwa ya politiki, yaramamaye cyane muri icyo gihe na nyuma ya 2018 ubwo harangiraga imyaka myinshi y’ubutegetsi bw’abo mu bwoko bw’aba Tigray.

Gusa nawe nyuma yaje guhindura anenga ubutegetsi bwa Abiy Ahmed.

Abiy yazanye impinduramatwara muri politiki n’ubwisanzure mu bucuruzi ndetse ahabwa igihembo cy’amahoro cya Nobel mu 2019 kubera kunga Ethiopia na Eritrea.

Gusa, ubushyamirane n’urugomo hagati y’amoko kubera politiki n’ubukungu byarakomeje muri iki gihugu kirimo amoko arenga 80.

Abiy yagerageje guhagarika ibi ashaka ko abatuye igihugu biyunga, ariko ananizwa n’abatsimbaraye ku moko, ndetse umuhate we uzageragezwa kurushaho mu matora ateganyijwe.

Ayo matora yari kuzaba mu kwezi kwa munani, ariko yimuriwe mu mwaka utaha kubera Coronavirus.

BBC