skol
startimes

RDC: Abari mu mirwano ishyamiranyije amoko bakomeje guterana amagambo

Amakuru   Yanditswe na: Dusingizimana Remy 5 June 2020 Yasuwe: 881

Kuva ku cyumweru kugeza kuwa gatatu mu duce dutandukanye tw’Akarere ka Minembwe muri teritwari ya Uvira, Kivu y’Epfo, haravugwa imirwano ikomeye ishyamiranyije imitwe yitwaje intwaro ishingiye ku moko y’Abanyamulenge, Abanyindu,Abafulero n’abandi.


Kuwa gatatu, Pierrot Kaluba ukuriye ubwoko bw’Abanyindu yabwiye BBC ati: "ibintu bimeze nabi, igihugu cyose cyasambutse", ashinja abarwanyi b’Abanyamulenge bayobowe na Col Michel Rukunda bahimba Makanika, kubatera bakica abaturage.

Col Makanika yaraye abwiye BBC Gahuzamiryango ko ariho arwana n’Aba-Mai-mai kandi yabasubije inyuma akabambura aho bari barigaruriye.

Mu karere ka Minembwe ubushyamirane buhamaze igihe bwatumye abarenga abagera ku 46,000 bava mu byabo barahunga nk’uko umukuru wako Gad Mukiza aheruka kubibwira BBC Gahuzamiryango.

Karuba avuga iki?

Pierrot Kaluba yabwiye BBC ko imirwano yatangiye ku cyumweru ubwo Col Makanika n’abarwanyi be bagabye igitero mu gitondo bavuye muri teritwari ya Uvira bagatera muya Fizi ahitwa Murambya.

Ati: "Bararashe hapfa abantu 25 hakomereka 15, abo bapfuye harimo abana bane(4) abagabo 16 n’abagore batanu. Ibimenyetso dufite ni impunzi zatubwiye amakuru".

Avuga ko bucyeye kuwa mbere imirwano yakomeje, abarwanyi ba Makanika ngo bafite imbaraga nyinshi batwitse uduce twa Kabara, Zinda, Kivumu kuwa gatatu batera ahitwa Nyamala.

Bwana Kaluba ati: "Abarwana ni Makanika urwana n’abasivili b’Ababembe n’Abanyindu n’aba Mai Mai... ayoboye Gumino ivanzemo n’izindi ngabo tutazi, bavugako harimo n’Abarundi".

Bwana Kaluba avuga ko imirwano iri kuba idasanzwe, ati: "Ubu imirwano yaje ni imirwano ikaze, irakoresha imbunda zikomeye za rutura".

Avuga ko abaturage benshi, barimo n’abo mu bwoko ayoboye, bahunze bagana mu gace ka Moyen Plateau kuko abarwanyi ba Col Makanika bagenda batwika inzu. Akemeza ko nta ngabo za leta zihari zo kubatabara.

Ati: "Ingabo ziri ahitwa mu Bujombo na Mikenke ahandi n’uduhari tubiri ntitwabasha kubarwanya twahise duhunga, ni abantu bakomeye cyane".

Makanika avuga iki?

Col Michel Rukunda uzwi cyane Makanika yahoze mu ngabo za leta azivamo atorotse mu mwaka ushize, avuga ko yagiye kurwanira abo mu bwoko bwe bw’Abanyamulenge buganirijwe.

Yavuganye na BBC kuri uyu wa kane ari ahitwa Kamombo muri teritwari ya Fizi aho avuga ko yageze arwana n’aba Mai Mai.

Abajijwe icyo bapfa muri iyo mirwano yagize ati: "Turapfa icyo batuziza [Abanyamulenge], bagize umugambi wo kudutsemba no kuturandura iwacu, duhinduka impunzi dufata imbunda kugira ngo twirwaneho".

Col Makanika ahakana ko ari umuyobozi wa Gumino, avuga ko nta mutwe w’inyeshyamba ayoboye ahubwo ari kumwe n’abasiviri bafashe imbunda ngo "baharanire uburenganzira bwo kubaho".

Avuga ko imbunda bazambura aba Mai-Mai barwana ati: "turanazishaka nk’uko nabo bazishaka, tukazibona".

Bwana Makanika avuga ko ibibazo byabo leta ibizi ariko ntacyo ibikoraho.

Ati: "Twaravuze, abantu baraboroze babura gitabara, ugasanga abasirikare ba leta bari mu karere bararinda abaturage b’ubwoko bumwe abandi bakabanyaga, hanyuma ngo tubyihanganire tubireke?"

Makanika avuga ko ubu [kuwa kane] imirwano ibaye ihagaze kuko bavanye aba Mai-Mai mu turere bari barigaruriye, we avuga ko abapfiriye mu mirwano atari abasiviri.

Ati: " Nta musiviri wapfuye, abo bavuga 25 ni abaMai-mai buzuye, barimo n’ababayoboye".

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

FARDC yigambye guha isomo inyeshyamba zo mu Burundi izigera kuri 30...

Ingabo za Repubulika iharanira Demokarasi ya Kongo zatangaje ko zafashe...
26 October 2020 Yasuwe: 2051 2

Gen.Secyugu wari ushinzwe ibikorwa bya Gisirikare muri FDLR...

Gen Nsengiyunva Secyugu wari ushinzwe ibikorwa bya gisirikare muri FDLR...
24 October 2020 Yasuwe: 6602 0

Abarwanyi amagana bavuye muri Mozambique batera Tanzania

Polisi muri Tanzania yemeje ko abantu bitwaje intwaro barenga 300 baturutse...
23 October 2020 Yasuwe: 3091 0

Perezida Macron yasabye ubufasha Uburusiya mu kurwanya iterabwoba nyuma...

Perezida Emmanuel Macron yasabye Uburusiya kongera ubufatanye mu kurwanya...
21 October 2020 Yasuwe: 1024 0

Umwarimu w’amateka yaciwe umutwe azira kwerekana igishushanyo cya...

Umwarimu w’amateka wo mu gihugu cy’Ubufaransa yaciwe umutwe azira kwerekana...
17 October 2020 Yasuwe: 2049 0

Umugore yatabawe amaze umwaka n’igice afungiwe mu bwiherero n’umugabo...

Umugore w’imyaka 35 wo mu gihugu cy’Ubuhindi yatabawe na polisi yo mu gace...
15 October 2020 Yasuwe: 8291 1