addresiya
startimes

Gicumbi: RIB yakanguriye abaturage gukumira ibyaha by’icuruzwa ry’abantu n’ibiyobyabwenge

Amakuru   Yanditswe na: Dusingizimana Remy 14 May 2019 Yasuwe: 362

Ikigo cy’igihugu cy’ubugenzacyaha,RIB,cyasabye abaturage bagize Umurenge wa Ruvune mu karere ka gicumbi ubufatanye mu gukumira ibyaha by’icuruzwa ry’abantu n’ibiyobyabwenge bitaraba binyuze mu gutangira amakuru ku gihe.



Kuri uyu wa Kabiri,taliki ya 14 Gicurasi 2019,nibwo abayobozi ba RIB buri kumwe n’umunyamabanga wa Leta muri Minisiteri y’Ubutabera,umuyobozi w’intara y’Amajyaruguru,abayobozi b’ingabo na polisi n’abayobozi b’uturere twose tugize intara y’Amajyaruguru bahuriye mu murenge wa Ruvune mu bukangurambaga bwari bugamije gusaba abawutuye gukumira ibyaha by’icuruzwa ry’abantu n’ibiyobyabwenge ku nsanganyamatsiko igira iti “Sobanukirwa ibyaha ubyirinde ubirinde n’abandi”.

Umunyamabanga Mukuru w’Urwego rw’Igihugu rushinzwe ubugenzacyaha,RIB, Col Ruhunga Kibezi Jeannot yabwiye abari bitabiriye ubu bukangurambaga ko ubucuruzi bw’abantu ko ari icyaha kibangamira umutekano w’abanyarwanda ariyo mpamvu basaba Abanyarwanda kugira uruhare mu kuburwanya.

Yagize ati “Iyo bagucuruje kugira ngo urokoke ni amahirwe y’Imana.Ibiba ku bacurujwe ni ubucakara hari bamwe bashora mu bikorwa by’Uburaya.Ibyo bintu nta munyarwanda ukwiriye kubyemera.Amahirwe ni uko mu Majyaruguru nta birahagera ariyo mpamvu tubibaganirije kugira ngo bitazabageraho cyane ko muturiye umupaka.

Kuba tubiganira uyu munsi ni ukugira ngo mubimenye mubyirinde.Irari ry’amafaranga gukira vuba,kukubwira ngo ugiye mu ndege,kuguha amadolari,kukubwira ngo ugiye mu mahanga,nta mahanga aruta u Rwanda.Muzaganire n’abagiyeyo bazababwira ko nta hantu heza haruta igihugu cyawe.

Umunyamabanga Mukuru w’Urwego rw’Igihugu rushinzwe ubugenzacyaha yakomeje avuga ko ibiyobyabwenge bisenya imiryango,bikangiza uburere bw’abana ariyo mpamvu abanyarwanda bakwiriye kubirwanya.

Yagize ati “Ibiyobyabwenge murabizi,mufite abantu bishwe na Kanyanga,urumogi,mufite ingo zisenyuka kubera urumogi,abana bata amashuli kubera urumogi.Ingaruka zabyo murazizi.Ndabasaba ngo urwo rugamba turufatanye kuko ingaruka zabyo zigaruka mu muryano,abagabo bagakubita abagore babo,abagore basinda bagakubita abagabo babo n’abana.Murabizi kenshi havamo n’impfu z’abantu.murabizi mu Kinyarwanda baca umugani ngo uhishira umurozi akakumaraho urubyaro.Muzahishira abacuruza ibiyobyabwenge bazabamaraho urubyaro.Turifuza ko tuva hano twiyemeje kurwanya ibyaha kandi bizacika.Icyo tubasaba ni ugutanga amakuru.

Umunyamabanga wa Leta muri Minisiteri y’Ubutabera Evode Uwizeyimana yasabye abatuye Umurenge wa Ruvune ko bagomba kumenya ibibi by’ibiyobyabwenge no gucuruza abantu kugira ngo bamenye uko babyirinda.

Yagize ati “Iyo udasobanukiwe ibi byaha uko bikorwa ntabwo wamenya uko wabyirinda.Gucuruza abantu no kunywa ibiyobyabwenge ntabwo ari umuco w’Abanyarwanda.Umuntu unywa ibiyobyabwenge,ubicuruza n’ubihinga,ntaho atandukaniye n’umurozi.Mureke dushikame dukore, iki gihugu kirimo ibintu byose.Nta kintu mujya gushaka mu mahanga kitari mu Rwanda.Ushaka kujya hanze ntabwo u Rwanda rufunze, ariko reka igihugu kimenye ibyo ugiye gukora ariko batagiye kugucuruza.Bababwiye amayeri abacuruza abantu bakoresha.Gerageza kwegera inzego z’umutekano niba ubonye akazi,zimenye niba igihugu ugiyemo hari umutekano kugira ngo batagucuruza.”

Muri ubu bukangurambaga,Uwera Alice yatanze ubutumwa bwakoze benshi ku mutima bw’ukuntu yacurujwe mu gihugu cya Koweit ,agakorerwa ubucakara bwamuviriyemo uburwayi bw’ibihaha ariko kubw’amahirwe Leta y’u Rwanda ikamutabara ari hafi gupfa.

Abatuye mu murenge wa Ruvune baganiriye n’Umuryango nyuma y’ubu bukangurambaga bemeje ko bwabagiriye akamaro kuko batari bazi ikigo cya RIB ndetse n’imikorere yacyo ndetse bemeza ko biyemeje gukumira ibyaha by’ubucuruzi bw’abantu n’ibiyobyabwenge bitaraba.

Nsanzumuhire Isaie yagize ati “RIB twayumvaga gusa ntabwo twari tuyizi neza.Muri ubu bukangurambaga twumvise ko tugomba gukumira ibyaha byo gucuruza ibiyobyabwenge no gucuruza abantu bitaraba.Ubuyobozi bwegerejwe abaturage,hari amasibo,tugiye kujya dutangira amakuru ku gihe.

Icyishaka Joseline yagize ati “Niyemeje gutangira amakuru ku gihe,ibiyobyabwenge bitaragera mu bantu ngo bibangize.Nimbona umuntu ushaka gucuruza ibiyobyabwenge cyangwa abantu ngomba guhita mbimenyesha ubuyobozi.Ndamutse Menye umuntu ushaka gucuruza abantu,nabimenyesha ubuyobozi kugira ngo hatagira uwangirika kandi akenewe kugira ngo akorere igihugu.”

RIB yavuze ko mu mwaka wa 2017 yakiriye amadosiye 47 y’icyaha cy’icuruza ry’abantu mu gihugu hose. Icyenda muriyo ava mu ntara y’Amajyaruguru. Akarere ka Gicumbi kakaba kari gafitemo dosiye 1 mu gihe mu amadosiye 49 yakiriye muri 2018, Intara y’Amajyaruguru ifitemo 11 harimo dosiye 2 zo mu Karere ka Gicumbi.Uyu mwaka nta dosiye y’icyaha cyo gucuruza abantu iragaragara.

RIB yasabye abaturage baturiye Umurenge wa Ruvune kwitabaza nimero ya 116 mu gihe bakeneye gutanga amakuru ku byaha byo gucuruza abantu n’ibiyobyabwenge.

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?
    Log in

    Amategeko n'amabwiriza birkurikizwa


Inzindi nkuru

U Rwanda na Amerika byashimangiye ubufatanye mu bya Gisirikare[AMAFOTO]

U Rwanda na Leta zunze ubumwe za Amerika byashyize umukono ku masezerano...
29 May 2020 Yasuwe: 2033 0

Ba Gitifu na Dasso baherutse kugaragara mu mashusho bakubita abaturage...

Uwahoze ari Umunyamabanga Nshingwabikorwa w’Umurenge wa Cyuve, Sebashotsi...
29 May 2020 Yasuwe: 689 0

Umunyarwanda Mpfizi yagiye mu marushanwa yo gukina Filimi z’urukozasoni...

Amazina ye ni Ngundu mu rurimi rw’ikigande,mu kinyarwanda rikaba risobanuye...
28 May 2020 Yasuwe: 19597 3

Kayonza: Abana 4 bagwiriwe n’ikirombe

Abana bane bo mu Murenge wa Murama mu Karere ka Kayonza,bahanukiwe nicyo...
15 May 2020 Yasuwe: 1022 0

Abantu 10 bakize Coronavirus mu Rwanda kuri uyu wa Mbere mu gihe umwe...

Minisiteri y’Ubuzima mu Rwanda yatangaje ko uyu munsi habonetse umuntu umwe...
11 May 2020 Yasuwe: 1819 0

Rwanda:Ibihano bihanishwa uwagejeje saa mbili z’ijoro ari mu...

Nyuma yuko guhera kuri uyu wa Mbere taliki ya 04 Gicurasi amategeko ya...
7 May 2020 Yasuwe: 8046 0