Urwego rw’Igihugu rw’Ubugenzacyaha (RIB) rwemeje ko rwataye muri yombi uwitwa Bonane Aimable ushinjwa gukubita uwamukodesheje inzu, Pierre Nkazamurego mu Mudugudu w’Inyarurembo mu Kagari k’Amahoro mu Murenge wa Muhima mu Karere ka Nyarugenge.

Sponsored Ad

Nkuko amakuru dukesha ikinyamakuru Bwiza.com abitangaza, mu gitondo cyo kuwa 28 Mutarama nibwo uyu Nkazamurego yabyutse mu gitondo asanga Bonane w’imyaka 36 ari gusakuza hanze, ari gutera imetero mu gipangu cye ari nako avuga ko abana n’Interahamwe.

Ubwo inzego z’umutekano zahageraga mu gitondo, zasanze Bonane yifungiranye zisaba uyu Nkazamurego wahohotewe kwegera Sitasiyo ya RIB mu Murenge wa Muhima.

Abaturanyi ba Bonane Aimable bawiye Bwiza.com ko uyu musore yaje gutabwa muri yombi akaba afungiwe kuri Sitasiyo ya RIB mu Murenge wa Muhima.

Ibi kandi byemezwa na Nkazamurego uvuga ko uwamuhoteye ari ho afungiwe kandi ko inzego z’iperereza zikomeje kumutuma ibikenewe mu ipererereza.

Kugeza ubu, Nkazamurego akaba yaramaze kujya kwa muganga aho yahawe imiti.

Umuvugizi w’ Urwego rw’Igihugu rw’Ubugenzacyaha, Marie Michelle Umuhoza yatangarije Bwiza.com ko uyu Bonane afungiwe kuri Sitasiyo ya RIB ya Muhima Kuva kuwa Kabiri tariki ya 28 Mutarama akurikiranweho gukubita no gukomeretsa Nkazamurego.

Ati " Ni byo koko yafashwe ku munsi w’ejo, akurikiranweho gukubita no gukomeretsa umugabo witwa Pierre Nkazamurego. Iperereza riracyakomeje."

Ubuyobozi bw’Umudugudu w’Inyarurembo bwari bwatangarije Bwiza.com ko butazi ikibazo kiri hagati ya Nkazamurego na Bonane Aimable.