Umujyi wa Kigali washyize ikibumbano cy’agatangaza mu masangano y’ahazwi nka Sonatubes [AMAFOTO]

Amakuru   Yanditswe na: Martin Munezero 28 December 2019 Yasuwe: 4813

Umujyi wa Kigali washyize ikibumbano cy’agatangaza mu masangano y’ahazwi nka Sonatubes mu karere ka Kicukiro mu rwego rwo kurimbisha umujyi no gusobanura neza umuco w’abanyarwanda wo kwakira abashyitsi.



Ni mu gihe mu bice bitandukanye by’umujyi wa Kigali hakomeje kurimbishwa imitako y’iminsi mikuru inogeye ijisho yaba ku nyubako z’abikorera n’iza leta ku buryo abawugendamo n’abawukoreramo bibagaragariza ko abanyarwanda bose bakereye kwinjira mu mwaka mushya wa 2020 mu byishimo.

Iki kibumbano gishya cyashyizwe ku masangano ya Sonatubes gikozwe mu buryo butangaje kuko kigaragaza abantu batatu bishimye cyane babyina imbyino gakondo nyarwanda zizwi nk’imishayayo ubusanzwe zifashishwaga mu kwakira abashyitsi mu muco w’Abanyarwanda.

Kigaragaza abantu babiri b’abagore bashayaya buri umwe yerekeye ku ruhande rwe hagati harimo umugabo w’umukaraza ubavugiriza ingoma yambaye amayugi nawe areba ku rundi ruhande ku buryo aho ariho hose waba uturuka haba mu muhanda uturuka I Remera, umuhanda uturuka ku kibuga cy’indege cya Bugesera ndetse n’umuntu uturuka mu mujyi rwagati mu muhanda uzwi nka Rwandex ahabwa ikaze n’iki kibumbano ku buryo bworoshye.

Ubuyobozi bw’umujyi wa Kigali butangaza ko iki kibumbano ari ikimenyetso cy’ikaze n’ibyishimo kuri buri wese ugana uyu mujyi n’u Rwanda muri rusange bukagaragaza binyuze mu nyandiko isobanura imiterere y’iki kibumbano ko kuba umugabo ari hagati y’abagore babiri bigaragaza ubumwe no kwimakaza ihame ry’uburinganire mu banyarwanda.

Iki kibumbano cyakozwe n’umunyabugeni witwa Bushayija Pascal giteretse ku murambararo wa metero 4 kikaba gifite uburebure bwa metero 1.2 kikaba kinafite imigongo isanzwe imenyerewe mu mitako ya Kinyarwanda.

Umuyobozi w’umujyi wa Kigali, Pudence Rubingisa yatangaje ko iki kibumbano cyashyizwe aha hantu mu rwego rwo gukomeza kurimbisha umujyi no mu bice bihurirwamo n’abantu benshi.

Rubingisa ati “Biri muri gahunda yo gukomeza kongera ubwiza bw’ibice bihurirwaho n’abantu benshi. Twamaze kubaka ahantu abantu bashobora kwicara bakaganirira imbere y’icyicaro cy’umujyi wa Kigali, ndetse n’ubundi busitani burimo gutunganywa I Nyandungu n’ahahoze inganda i Gikondo.”

Rubingisa Pudence akomeza avuga ko hakirimo gushakishwa ingengo y’imari yazatuma n’ayandi masangano y’imihanda yose atunganywa kimwe n’ahandi hantu hashobora guhurira abantu benshi, bikaba biteganyijwe ko ayandi masangano 8 atandukanye aboneka mu mujyi wa Kigali araba yatunganyijwe mu gihe gito.

Kuri aya masangano kandi hashyizwe na kamera nini icunga umutekano ku mpande zose z’imihanda ihahurira hanaterwa indabyo zirushaho kuhagira heza.





Hanashyizwe Camera icunga umutekano wo kumihanda y’impande z’aya masangano

Amafoto@IGIHE

Author : Martin Munezero

Ibitecyerezo

  • Log in

    Amategeko n'amabwiriza birkurikizwa


  • chat_bubble kamanayo

    Byiza weeee!!! Byerekana Culture y’abanyarwanda.Bigomba kuba bihenze cyane.Ibibumbano bigamije kwerekana culture,ni byiza.Ariko tugomba kwitondera ibibumbano bakoresha mu madini,bigamije gukoreshwa mu gusenga.Ibyo Imana irabitubuza.Ikatubuza kubibumba,kubibaza cyangwa kubipfukama imbere.Ikatubuza kubitunga mu nzu,mu nsengero (mu modoka),ndetse ikavuga ko ababitunga n’ababikoresha bazarimburanwa nabyo ku munsi wa nyuma.Ikibazo nuko abantu badashaka kumva uyu muburo (warning) w’imana.Bible ivuga ko Imana ari umwuka,ngo abayisenga bagomba kuyisenga mu mwuka.Nukuvuga nta kintu bareba cyangwa bifashishije.Abigishwa ba Yezu tugenderaho,nta na rimwe bakoreshaga ibibumbano cyangwa amashapule.Byazanywe n’amadini yavutse nyuma.Babyita Apostasy.

    1 month ago

Inzindi nkuru

Ntawe urenza amasaha 72 mu kigo kizwi nko “kwa Kabuga”-Bosenibamwe

Raporo y’umuryango utegamiye kuri leta Human Rights Watch (HRW) ivuga ko...
28 January 2020 Yasuwe: 2056 0

Gatsibo:Umupasiteri n’umudiyakoni bafatanye mu mashati bararwana imbere...

Mu itorero Inkuru Nziza mu Rwanda, muri Paruwasi ya Gatsibo mu Mudugudu wa...
28 January 2020 Yasuwe: 3546 0

Reba tumwe mu turere tugiye kongera kugusha imvura nyinshi ivanze...

Ikigo cy’Igihugu gishinzwe ubumenyi bw’ikirere (Meteo Rwanda), kiraburira...
28 January 2020 Yasuwe: 3071 0

Musanze:Emmanuel Ntagahora yafunzwe azira kwiba inka afunguwe ajya kuyihiga...

Mu murenge wa Muhoza, akarere ka Musanze mu ntara y’Amajyaruguru, umugabo...
27 January 2020 Yasuwe: 3868 0

Minisiteri y’uburezi yongeye gukomorera abantu batize uburezi

Minisiteri y’uburezi yongeye gukomorera abantu batize uburezi ariko...
27 January 2020 Yasuwe: 4207 3

Padiri Habyarimana Andre wa Diyoseze ya Kabgayi kwifata byaramunaniye...

Padiri Habyarimana Andre Avellin ni Umupadiri wahoze akorera muri Diocese...
27 January 2020 Yasuwe: 5861 2