addresiya
Kigali
startimes

Leta y’u Rwanda yamaze gutangaza uko inguzanyo yahawe na IMF izakoreshwa

Amakuru   Yanditswe na: Dusingizimana Remy 4 April 2020 Yasuwe: 2036

Minisiteri y’imari n’igenamigambi yatangaje ko inguzanyo ya miliyoni 109.4 z’amadorari u Rwanda rwemerewe n’Ikigega Mpuzamahanga cy’Imari IMF, azafasha igihugu guhangana n’ingaruka za Koronavirusi ku bukungu bw’igihugu.



Mu kiganiro minisitiri w’imari n’igenamigambi Dr. Uzziel Ndagijimana yahaye RBA kuri uyu wa Gatanu yasobanuye ko Coronavirus yatumye haba ibyuho mu ngengo y’imari ya Leta y’u Rwanda ndetse umuvuduko w’izamuka ry’ubukungu bw’igihugu uragabanyuka.

Yagize ati "Ingengo y’imari izagerwaho n’ingaruka z’ubwoko bubiri: Icya mbere ni uko amafaranga yagombaga kwinjira mu isanduku ya Leta ava mu misoro azagabanuka kuko uhereye no ku bucuruzi byagaragaye ko amahooro avuye ku bitumizwa hanze yatangiye kugabanyuka, ariko n’imisoro y’imbere mu gihugu bitewe n’uko ibikorwa byasubiye inyuma na yo izagabanuka. Icyuho cya 2 kijyanye no gukoresha amafaranga menshi ku bintu bitunguranye bitari biteganyijwe. Twasubiye mu mibare yacu ijyanye n’imizamukire y’ubukungu, muzi ko umwaka ushize twari twageze ku muvuduko wa 9.4% muri 2019, ariko muri uyu mwaka kubera iki cyorezo twasubiye mu mibare dufatanyije na IMF, turateganya ko umuvuduko wamanuka ukagera kuri 5.1%.

Kuva icyorezo cya koronavirusi cyagera mu Isi cyahungabanyije imibereho y’abayituye mu nguni zose z’ubuzima, ndetse guhangana nacyo bisaba ingengo y’imari ibihugu birimo n’u Rwanda bitari byarateganyije.

Mu rwego rwo gushyigikira u Rwanda mu rugamba rwo guhangana n’icyorezo cya koronavirusi n’ingaruka zacyo, Inama y’Ubutegetsi ya IMF yemereye u Rwanda miliyoni 109.4 z’amadorali, ni ukuvuga asaga miliyari 100 z’amafaranga y’u Rwanda.

Ni amafaranga azifashishwa mu bikorwa binyuranye, birimo no gushakira abaturage ba nyakabyizi ibibatunga.

Minisitiri Dr Ndagijimana ati "Aya mafaranga ntabwo ari amafaranga agenewe umushinga runaka, ni amafaranga aza mu ngengo y’imari akaziba icyuho giterwa n’uko muri iki gihe Leta igomba gukoresha amafaranga menshi cyane cyane nko mu rwego rw’ubuzima kugirango haboneke ibyangombwa byose byo gupima abantu, kuvuza ababonetseho uburwayi no kubona ibikoresho bitandukanye ndetse no gutabara abaturage."

Guverinoma y’u Rwanda ivuga kandi ko nubwo aya mafaranga ari inguzanyo, ku rundi ruhande ari nk’inkunga kuko inyungu yayo ari 0% akazishyurwa mu gihe cy’imyaka 10 uhereye mu myaka 5 iri imbere.

U Rwanda rubaye igihugu cya mbere cya Afurika cyemerewe aya mafaranga, dore ko hari hashize icyumweru kimwe ruyasabye, ibintu Impuguke mu bukungu akaba n’umwarimu muri kaminuza Dr. Kabano Ignace avuga ko bishimangira icyizere ibigo mpuzamahanga by’imari n’ubucuruzi bifitiye u Rwanda.

Guverinoma y’u Rwanda kandi iri mu biganiro n’abandi bafatanyabikorwa bayo nka Banki y’Isi na Banki Nyafurika itsura Amajyambere, mu rwego rwo gushaka amikoro yo kuziba icyuho mu bukungu bwarwo no guhangana n’icyorezo cya koronavirusi.

Minisitiri w’imari n’Igenamigambi Dr Ndagijimana akavuga ko ibyo byose bikorwa hashingiwe ku bushobozi igihugu gifite bityo ko izo nkunga cyangwa inguzanyo zidashobora kubera igihugu umutwaro.

Yagize ati "Ntabwo ari umutwaro kuko umutwaro munini aba ari inyungu ku nguzanyo kandi iyi nkunga nta nyungu zirimo, ikindi kandi yishyurwa mu gihe kirekire kandi agatangira kwishyurwa nyuma y’imyaka 5 n’igice, ntabwo ari vuba. Ni ukuvuga ngo hagati aho ubukungu buba bwarazamutse ku buryo n’ubushobozi bwo kwishyura buba bumaze kwiyongera. Ikindi kandi buri gihugu kiguza gishingiye ku bushobozi bwo kwishyura. Ntabwo igihugu kirimo gufata amafaranga arengeje ubushobozi busanzwe buteganyijwe bwo kuba twakoresha inguzanyo."

IMF kandi yemeye gusonera u Rwanda umwenda wa miliyoni 68 z’amadorali ya Amerika, ni ukuvuga asaga miliyari 65 z’amafaranga y’u Rwanda, rwari kuzishyura icyo kigega mu myaka 2 iri imbere.

Kuba umubare w’abanduye Coronavirus warakomeje kwiyongera,byatumye kuwa 01 Mata 2020,Leta y’u Rwanda yongera ikindi gihe cy’iminsi 15 y’ibihe bidasanzwe byo gusaba Abanyarwanda kuguma mu rugo,bagasohoka hanze bagiye gukora ibyangombwa nko kwivuza no guhaha ndetse no gucuruza izi serivisi.

Leta y’u Rwanda yatangaje ko iki gihe cy’iminsi 15, kizageza tariki 19/04/2020 gusa gishobora kwiyongera igihe haba hakomeje kugaragara cyane ubwandu bwa Coronavirus.

Muri iki gihe amashuri yose mu gihugu, utubari n’imyidagaruro, insengero, ingendo mu gihugu, imipaka n’ibindi bizakomeza gufungwa ariyo mpamvu bimwe mu bigo n’abantu bikorera bakomeje gutaka ibihombo bikomeye.

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?
    Log in

    Amategeko n'amabwiriza birkurikizwa


  • chat_bubble Francis

    Ngaho se Leta izibuke n’abo ifitiye ibirarane bimaze imyaka n’imyaka nk’abakozi bahoze bakorera EWSA bahagaritswe mu kazi muri 2015.

    2 months ago

Inzindi nkuru

Abamotari batahanye amaganya ku munsi wa mbere wo gukomorerwa...

Benshi mu bamotari batangiye akazi ku munsi w’ejo nyuma yo gukomorerwa...
4 June 2020 Yasuwe: 2415 0

RURA yatangaje isaha ntarengwa imodoka na moto zitwara abagenzi zigomba...

Urwego Ngenzuramikorere, RURA rwatangaje ko imodoka zitwara abagenzi mu...
3 June 2020 Yasuwe: 5240 0

Ibiciro by’ingendo zambukiranya intara n’umujyi wa Kigali byiyongereye cyane...

Kuri uyu wa Gatatu tariki ya 03 Kamena 2020,Abagenzi bazindutse iya rubika...
3 June 2020 Yasuwe: 5950 0

Ingendo zihuza intara n’umujyi wa Kigali no gutwara abantu kuri moto...

Inama y’Abaminisitiri yateranye kuwa 2/06/2020, yemeje isubukurwa ry’ingendo...
3 June 2020 Yasuwe: 2846 0

Abarwayi 5 ba Covid-19 babonetse i Rusizi nibo batumye ingendo hagati...

Minisitiri w’Ubuzima Dr Ngamije Daniel yatangarije RBA ko ubwandu bushya bwa...
1 June 2020 Yasuwe: 1273 0

Abana bahagarariye abandi bagaragaje ibikorwa bibagenewe bifuza ko...

Abana batandukanye mu Rwanda bagaragarije Leta y’u Rwanda bimwe mu bikorwa...
29 May 2020 Yasuwe: 551 0