Zimwe muri Kaminuza zahagarikiwe amasomo ziribaza ukuntu zizategereza amezi 6 kandi zarashyize ku murongo ibyo zasabwe

19 April 2017. | Uburezi | 9 Ibitekerezo | Nsanzimana Ernest
  • Zimwe muri Kaminuza zahagarikiwe amasomo ziribaza ukuntu zizategereza amezi 6 kandi zarashyize ku murongo ibyo zasabwe

Zimwe muri Kaminuza n’ amashuri makuru byahagarikiwe amasomo tariki 16 Werurwe ziravuga ko kuri ubu zamaze gushyira ibintu ku murongo zikaba zitegereje ko Minisiteri y’ uburezi n’ inama nkuru y’ uburezi izifatira undi mwanzuro.

Ni mugihe icyo gihe (tariki 16 Werurwe) Minisiteri y’ uburezi yari yafashwe umwanzuro wo gufunga Kaminuza zitandukanye izindi zigahagarikirwa amasomo biturutse kukuba hari ibyo zasabwaga zitari zujuje.

Amashuri makuru na Kamunuza byahagarikiwe amasomo by’ agateganyo zahawe igihe kingana n’ amezi 6 yo kwikosora.

Kaminuza ya INES – Ruhengeli ni imwe muzahagarikiwe amasomo. Umuyobozi mukuru wa INES- Ruhengeli avuga ko kuri ubu bamaze gushyira ku murongo ibyo Leta yabasabye gutunganya.

Yagize ati “INES mu by’ukuri turebye raporo yadukoreweho twasanze ibituvugwaho atari ibintu bigoye, amezi atanu yari ashize ibyo batubwiye twabishyize ku murongo, ntabwo twategereza amezi atandatu, imvugo nziza ya Minisitiri, dutegereje ko ishyirwa mu bikorwa abana bakagaruka mu kigo natwe tugatanga uburezi.”

Tariki 10, Werurwe Minisitiri w’ uburezi Dr Papias Musafiri yavuze ko kaminuza zahagaritswe n’ izahagarikiwe amasomo amwe n’ amwe zahawe igihe kingana n’ amezi atandatu yo kwikosora.

Yagize ati "Niba mwumva ibyo bavuze mwe mwarashoboye kubisubiza, mubikore vuba twe turiteguye kuza kubarebera.”

Minisitiri w’ Uburezi Dr Papias Malimba kuri uyu wa kabiri tariki 18 Mata yabwiye Umuseke ko izo kaminuza n’ amashuri makuru byahagarikiwe amasomo amwe n’ amwe byasabwe kwikorera isuzuma bigakora raporo igaragaza ko ibyo basabwe babikoze, hanyuma iyo raporo ikazaherwaho n’ abakozi ba Minisiteri y’ uburezi igihe bazaba basubiye gukora ubugenzuzi.

Minisitiri Dr Musafiri avuga ko bamwe izo raporo bazizanye mu gihe abandi batarazizana.

Yagize ati “Basabwe gutanga raporo y’isuzuma bikoreye ubwabo. Bamwe barazitanze abandi ntibarazitanga. Ku bazitanze, ubu ziriho zirakorerwa isuzuma nyuma yaho itsinda ry’inararibonye bazajya muri ayo mashuli hanyuma bashyikirize Minisiteri raporo izashingirwaho hafatwa ibindi byemezo.”

Minisitiri w’Uburezi yavuze ko Inama Nkuru y’Uburezi (HEC) ari bo bagenzura iki gikorwa.

Icyemezo cyo guhagarika amwe mu mashuri makuru cyangwa guhagarika progaramu zayo cyagize ingaruka ku banyeshuri, bamwe bari baramaze kuriha amafaranga y’ishuri, abandi bararishye amafaranga y’icumbi n’azabatunga, bose basa n’abari mu gihirahiro.

Amashuri Makuru nka Rusizi International University (RIU), Singhad Technical Education – Rwanda (STES) rikorera Kicukiro, Mahatma Ghandhi University – Rwanda (MGUR) iherereye mu Karere ka Gasabo, na Nile Source Polytechnic of Applied Arts (NSPA) iherereye Huye yahagarikiwe ibikorwa by’agateganyo.

Andi Mashuri Makuru yahagarikiwe zimwe muri Porogaramu z’amasomo by’agateganyo, ariyo University of Technology and Arts of Byumba (UTAB), Open University of Tanzania (OUT) iherereye Ngoma, University of Gitwe yo mu Ruhango, Jomo Kenyatta University of Agriculture and Technology (JKUAT) iherereye Kicukiro, Institut Catholique de Kabgayi (ICK), na Institut d’Enseignement Superieur de Ruhengeri (INES-Ruhengeri).

Minisitiri w’Uburezi tariki ya 17 Werurwe yatangaje ko nubwo iki cyemezo cyagize ingaruka nyinshi ku banyeshuri, ariko ari na bo gifitiye akamaro kuko ngo nibasubira ku ishuri bazahabwa ireme ry’uburezi ryazabagirira akamaro.

Ibitekerezo
  • MyPassion

    claude
    20 April 2017 - Musubize

    twese dukeye neye iterambere nimba ibyo basabwe barabikosoye harebwa uko hafatwa undi mwanzuro kugirango hatagira abo bibangamira muburenganzira bwabo naho zizu wowe ibitekerezo byawe bishobora gusenya aho kubaka

  • MyPassion

    Fernandel
    20 April 2017 - Musubize

    Itonde Zizu. Niba banyiri ubwite bararangije gukora ibisabwa, nta mpamvu nimwe, n’imwe ariko bakomeza gutegereza! erega maye ababye n’abana barahababarira. Wowe ntacyo bikubwiye?

  • MyPassion

    Itankunda
    20 April 2017 - Musubize

    Ibyo muvuga nibyo ariko kandi abayobora izo nzego nabo ndizerako bazi gusoma neza kuburyo bari kubona ibyo mwandika igisigaye ni ukubasengera bagafata ibyemezo bidatinze.

  • MyPassion

    Donatien
    20 April 2017 - Musubize

    Nimureke uriya Muyobozi mushya bashyize muri HEC witwa Dr. MUVUNYI Emmanuel abanze yacengera neza muri icyo kibazo, we rwose azagikemura atajuyaje namara kukimenya neza, kuko tumuzi nk’umuntu w’umukozi kandi utagira amarangamutima y’amatindi. Rimwe na rimwe akoresha ukuri kandi akagira “droiture†mu kazi, ndetse nta muntu umuvugiramo ngo abyemere mu kazi ashinzwe, keretse niba nawe wenda hagati aha hari ibindi byiyumviro bya Politiki byatuma adakora akazi ke nta mususu.

    Hari za Kaminuza zigenga zikwiye gufunga imiryango kuko bigaragara ko ziroga abana aho kubaha ubumenyi bakeneye, izo Kaminuza zirazwi ntawazicira urubanza hano kuri Internet,hari ababishinzwe. Ariko na none mu by’ukuri Abashinzwe gukora “Audit†nabo bakagombye gukora neza mu buryo bukwiye kandi bwa kinyamwuga, bakareka icyo bita “amalgame†ngo bafate za Kaminuza bizwi ko zigisha neza kandi zifite ibikoresho bihagije hanyuma baziigirizeho nkana batume zifungirwa amashami kubera ishyari cyangwa agahimano.

    Iyo urebye nk’ibyo bakoreye INES bayifungira amashami ya “Civil Engineering†na “Biomedical†ubona harimo akagambane, urugomo, cyangwa ubugome. Rwose ibyo bintu byatangaje abantu benshi basanzwe bazi neza uko INES ihagaze muri ayo mashami, ndetse na bamwe mu baterankunga bayo bibajije impamvu ntibasobanukirwa. Ariko ibyiza ni ugutegereza “decision†ya nyuma ya Minister of Education nyuma yo koherezayo indi “Audit team†ngo irebe neza uko ibintu byifashe ubu.

    Kaminuza ya Gitwe nayo hari abavuga ko bayirenganyije cyane kuko mu bijyanye n’amasomo y’ubuvuzi, rwose turetse amatiku, i Gitwe baragerageza. MINEDUC rero yari ikwiye gushishoza neza ikareba niba muri ibi byemezo byafashwe nta baba barabirenganiyemo.

    Naho muri rusange ibyo kugenzura ireme ry’uburezi muri Kaminuza byo rwose ni ngombwa ahubwo MINEDUC yari yaratinze cyane kuko hononekaye byinshi kuva izo Kaminuza zihawe uburenganzira bwo kwigisha amashami anyuranye kandi mu by’ukuri zimwe muri zo zitari zibikwiye, nibwo ubona abanyeshuri barangiza muri izo Kaminuza bafite igipapuro cyitwa “Bachelor Degree†cyangwa “Master Degree†, nyamara ariko mu by’ukuri mu mitwe yabo nta kintu kirimo gifatika. Muri iki gihugu cyacu hari mythe y’icyitwa Diplome ya Kaminuza. Umuntu arakubwira ati njyewe mfite Diplome ya Licence muri ibi nibi, ariko wamubaza akantu gato kajyanye n’ibyo yize cyangwa wamuha dosiye runaka uti ngaho yikoreho, ugasanga igisubizo aguhaye ni mu mwijima gusa.

    Ariko niba hari igikwiye gukorwa na MINEDUC mbere ya byose ni ukuvugurura HEC Higher Education Council kuko benshi mu bakozi bakora muri HEC usanga mu by’ukuri batazi inshingano zabo kandi banafite ubushobozi buke budahagije ugereranyije n’uburemere bw’akazi kagombye kuhakorerwa. Ntabwo rwose ari ukubasuzugura cyangwa kubakerensa, ariko mu by’ukuri iyo urebye uburyo bakora, usanga badakora kinyamwuga cyo ku rwego rwa Higher Education, they are not professional enough at the level of Higher Education. Usanga bikorera nkaho bagenzura amashuri yisumbuye, ntabwo rwose bakora nk’abagenzura amashuri ya Kaminuza (amashuri makuru). Birakwiye rero kunyuza akeyo muri HEC.

  • MyPassion

    SHEMA
    20 April 2017 - Musubize

    Kaminuza niba zararangije ibyo zasabwaga ni iki kibura ngo ibyo Minister yavuze bishyirwe mu ngiro abana bave mu kangaratete biratangaje abagasigasiye ireme ry’uburezi(Ministeri na HEC) aribo bashyira akavuyo mu mashuri cyane ko bivugwa ko hajemo itunga gatoki na ruswa kuri amwe mu mashuri na Kaminuza!

  • MyPassion

    Gakuba
    20 April 2017 - Musubize

    Biragaragara ko harimo ikintu kuri amwe mu mashuri kuko nta kuntu wasiga University of Kigali na RTUC iyi y’amahoteli (zitagira naho zikorera) ngo ufunge Gitwe University burundu n’izindi bafungiye program nka INES! Hanyuma UNILAK yigisha environment conservation, kimwe na no kurwanya ibiza nta na ka Labo na kamwe ikigaramira, UNIK(INATEK) yigisha za chimie, biology nta ka labo ntirebwe ibi bintu birimo tena!

  • MyPassion

    Manzi
    20 April 2017 - Musubize

    Ibya mineduc birarambiranye abantu bari kubicira gahunda, twatangiye kwiga dufite target yigihe tuzarangiriza none bari kudutera igihe, badufungurire amashuri kuko biriya biryabarezi bashaka kutwoherezamo ntitwabyigamo kabisa.

  • MyPassion

    Emile
    20 April 2017 - Musubize

    Ibya HEC ni agaterera nzamba kabisa, wagirango ntamuyobi ifite, bakuyeho uwatoneshaga amakaminuza amwe n’amwe tugirango birakemutse ariko ndabona urwishe ya nka ......

  • MyPassion

    zizu
    19 April 2017 - Musubize

    atandatu mugomba kuyarangiza nyine komutari mwarabikemuye kera si mureke ministeri ibasuzume yitonze mutayikinga umwenda mumaso ngomwujuje ibisabwa kndi ntabyo

Tanga Igitekerezo