addresiya
startimes

Urubanza rw’ubujurire rwa ba basirikare 5 n’umusivili umwe bashinjwa ibyaha birimo no gusambanya abagore rwasubitswe

Amakuru   Yanditswe na: Dusingizimana Remy 21 May 2020 Yasuwe: 1568

Urukiko rwa gisirikare i Kanombe rwasubitse urubanza mu bujurire ruregwamo abasirikare batanu b’u Rwanda n’umusivili umwe, bakurikiranyweho ibyaha birimo kurema umutwe w’abagizi ba nabi, gukubita no gukomeretsa ndetse no gukoresha imibonano mpuzabitsina ku gahato.



Ibi byaha bashinjwa kuba barakoreye mu Mudugudu wa Kangondo ya II mu Murenge wa Remera mu Karere ka Gasabo.

Kuwa 13 Gicurasi 2020, Urukiko rwa Gisirikare i Kanombe rwafashe umwanzuro wo gufunga mu gihe cy’iminsi 30 y’agateganyo, aba basirikare batanu n’umusivili umwe kuko ibyaha bakurikiranyweho hari impamvu zikomeye zituma bakurikiranwa bafunzwe.

Bajuririye iki cyemezo. Kuri uyu wa Kane, tariki ya 21 Gicurasi 2020, abaregwa bose bitabye urukiko ngo baburane ubu bujurire ariko nta bunganizi mu mategeko bafite.

Nyuma yo kongera kwibutsa imyirondoro y’abaregwa no gusoma ingingo zitandukanye abaregwa bashingiyeho bajurira, abaregwa bagaragaje imbogamizi ko nta mwunganizi bafite, bityo ko batiteguye kuburana.

Abaregwa ni Private [Pte] Ndayishimiye Patrick, Pte Nishimwe Fidèle, Pte Gatete François, Pte Gahirwa John, Pte Twagirimana Theonetse n’umusivile witwa Ntakazirabo Donat.

Pte Ndayishimiye Patrick na Pte Nishimwe Fidèle ni bo urukiko rwahereyeho rugaragaza impamvu batanze zishyigikira ubujurire bwabo.

Bavuze ko amatariki baregwa ko basambanyije abantu, batabaga bakoreye ahabereye icyaha ndetse abareze ko bakubiswe bakaba badahuza amatariki n’umutangabuhamya wabo.

Bavuga ko ababashinja bavuga ko bakubitiwe mu ruhame ariko ntihagire utabara, bakanongeraho ko batabuze ku kazi bashinzwe.

Pte Nishimwe Fidèle yongeraho ko yajuririye icyemezo cy’urukiko kubera ko abavuga ko yabasambanyije batigeze bamufata cyangwa ngo bamutabarize agarutse kubasambanya, kuba abahohotewe bataratanze ikirego no kuba ubuyobozi bwe butaragaragaje ko yishe akazi.

Pte Gatete François we yavuze ko yajuririye icyemezo cy’urukiko kubera ko ibisobanuro bye bishimangira ko atataye izamu yari yahawe gucunga, bitahawe agaciro, ndetse no kuba aregwa gukubita abantu kandi aho bakubitiwe atarahageze uwo munsi.

Umusivili Ntakazirabo Donat we ntiyajuriye, ariko yari mu bitabye urukiko.

Pte Gahirwa John na Pte Twagirimana Theoneste nabo bagaragarije urukiko ko rutahaye agaciro ibisobanuro batanze ku kirego cy’izamu, ndetse ko abayobozi babo batagaraje ko bishe akazi bashinzwe.

Urubanza rwimuriwe ejo ku wa Gatanu tariki ya 22 Gicurasi 2020, saa yine zuzuye ku rukiko rwa gisirikare.

Ubushinjacyaha bwahawe umwanya wo kuvuga ku cyemezo cyo gusubika iburanisha rya none, buvuga ko bushingiye ku kuba abaregwa nta ruhare rugaragara bagize mu kutaboneka k’ubunganira mu mategeko kandi amategeko abemerera kuburana bunganiwe.

Gusa ubushinjacyaha bwavuze ko nta mpamvu igaragara yatumye umwunganizi mu mategeko ataboneka mu rubanza cyane ko atanatanze impamvu nk’uko biteganywa n’amategeko.

Urukiko rwasabye abaregwa ko bagomba kumenyesha umwunganizi wabo ko agomba kuzaboneka ejo, bitaba ibyo abaregwa bakazaburana batunganiwe.

Kuwa 13 Gicurasi 2020,Urukiko rwa gisirikare rwategetse ko abasirikare 5 bakomeza gufungwa by’agateganyo mu gihe bagikurikiranyweho ibyaha birimo gusambanya abagore ku ngufu.

Umucamanza yashimangiye icyifuzo cy’ubushinjacyaha ko hariho impamvu zituma hakekwa ko abaregwa bakoze ibyaha bakurikiranyweho.

Abaregwa ariko bo bakomeje guhakana uruhare mu byo bashinjwa bagashimangira ko batageze mu gace byemezwa ko bakoreyemo ibyaha.

Mu cyemezo cye, umucamanza yavuze ko inyandiko mvugo z’abaregwa ndetse n’abatangabuhamya zerekanye ko hari impamvu zikomeye zishinja babiri mu baregwa uruhare mu gusambanya abagore ku ngufu.

Abo ni Private Ndayishimiye Patrick w’imyaka 27 na Fidele Nishimwe we w’imyaka 23.

Ku ikubitiro abahohotewe ngo ntibashoboye kumenya imyirondoro y’abasirikare kuko bari bakuye amazina ku myambaro yabo y’akazi.

Gusa ubwo bajyanwaga mu kigo cya gisirikare cya Kami kiri hafi aho abaturage bahohotewe ngo bashoboye kwerekana amasura y’ababakoreye ibyaha.

Aba basirikare ngo bahakanye ibyaha ariko ntibashobora gusobanura uko bageze mu gace kabereyemo ibyaha kandi atari ho bari bagenwe gukorera akazi k’irondo.

Urukiko ngo rwabonye kandi n’ibimenyetso by’uko aba basirikare bakubise bakanakomeretsa abagabo mbere y’uko basambanya abagore babo.

Ku bandi basirikare 3 Gatete Francois, Gahirwa John na Theoneste Twagirimana, umucamanza asanga nta bimenyetso bikomeye byerekana ko babaye abafatanyacyaha mu cyaha cyo gusambanya abagore ku gahato nk’uko babiregwa n’ubushinjacyaha.

Gusa asanga hari ibimenyetso bikomeye byerekana ko barenze ku mategeko y’izamu ndetse no guhishira ibyaha byakozwe na bagenzi babo.

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?
    Log in

    Amategeko n'amabwiriza birkurikizwa


Inzindi nkuru

Nyanza: Abantu 24 bahamijwe n’Urukiko ibyaha by’iterabwoba n’ubugambanyi

Urukiko Rukuru, Urugereko rwihariye ruburanisha ibyaha Mpuzamahanga...
29 May 2020 Yasuwe: 838 0

Nyamagabe: Polisi yataye muri yombi umusore yafashe ari kwiba...

Polisi ikorera mu Karere ka Nyamagabe muri Sitasiyo ya Polisi ya Tare,...
29 May 2020 Yasuwe: 663 0

Ladislas Ntaganzwa wagize uruhare muri Jenoside yakorewe Abatutsi yakatiwe...

Urugereko rwihariye rw’urukiko rukuru ruri mu mujyi wa Nyanza mu majyepfo...
28 May 2020 Yasuwe: 869 0

Gasabo: Polisi yafunze abantu 20 barenze ku mabwiriza yo kwirinda COVID-19...

Polisi y’u Rwanda yerekanye abantu 20 bafunzwe bazira kurenga ku mabwiriza...
24 May 2020 Yasuwe: 2056 0

Gasabo: Polisi yataye muri yombi abasore 2 bakoraga amafaranga...

Kuri sitasiyo ya Polisi ya Ndera mu karere ka Gasabo hafungiwe abasore...
24 May 2020 Yasuwe: 1178 0

Bugesera: Umusore n’inkumi bafashwe bari kwiba ibitabo by’ikigo cy’amashuli...

Ku bufatanye n’abaturage, kuwa Gatatu tariki ya 20 Gicurasi ahagana saa yine...
22 May 2020 Yasuwe: 2287 0