Minisiteri y’Ubuzima yatangaje ko kuri uyu wa Kane tariki ya 22 Ukwakira 2020, abantu 05 basanzwemo COVID-19 mu gihe abandi 05 bayikize mu bipimo 2,051 byafashwe.Umubare w’abamaze kwandura iki cyorezo wabaye 5,017.
Abasanzwemo Coronavirus uyu munsi bose uko ari 05 bagaragaye mu mujyi wa Kigali gusa.Umubare w’abamaze gukira bose hamwe ni 4,803.Abakirwaye ni 180 mu gihe abamaze gupfa bose ari 34.
Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura (...)

Sponsored Ad

Minisiteri y’Ubuzima yatangaje ko kuri uyu wa Kane tariki ya 22 Ukwakira 2020, abantu 05 basanzwemo COVID-19 mu gihe abandi 05 bayikize mu bipimo 2,051 byafashwe.Umubare w’abamaze kwandura iki cyorezo wabaye 5,017.

Abasanzwemo Coronavirus uyu munsi bose uko ari 05 bagaragaye mu mujyi wa Kigali gusa.Umubare w’abamaze gukira bose hamwe ni 4,803.Abakirwaye ni 180 mu gihe abamaze gupfa bose ari 34.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

U Rwanda kimwe n’ibindi bihugu, rwagezweho n’ingaruka z’icyorezo cya Covid-19 mu nzego zitandukanye bitewe n’ingamba zafashwe rugikubita zirimo gahunda ya Guma Mu Rugo, gufunga imipaka, guhagarika ingendo mpuzamahanga no gusubika inama zikomeye.

Uko iminsi yagiye ihita ni ko abayobozi bo mu nzego zitandukanye na bo bakomeje gufatanya n’abaturage mu guhangana n’icyo cyorezo ariko hanafungurwa ibikorwa bimwe na bimwe.

Ishami ry’Umuryango w’Abibumbye ryita ku Buzima (OMS), ryashimye u Rwanda ku ngamba zihamye rwashyizeho zikarufasha guhangana n’icyorezo cya COVID-19 mu buryo bwihariye.

Umuyobozi Mukuru wa OMS Dr Tedros Adhanom Ghebreyesus yavuze ko umusaruro w’ingamba zo kurwanya COVID-19 mu Rwanda ushingiye ku miyoborere myiza ishyira imbere ubuzima bw’abaturage, guharanira ubuvuzi kuri bose, abakora mu rwego rw’ubuzima bashyigikiwe ndetse na gahunda z’itumanaho n’isakazamakuru bifite ireme.

Dr. Tedros yagize ati: “U Rwanda rwakoresheje imbaraga zose za Guverinoma mu guhangana no gukurikirana icyorezo cya COVID-19, kubahiriza amabwiriza y’ibanze uhereye ku gupima no gukurikirana abahuye n’abarwayi, ari na ko hubahirizwa ingamba zo gukumira ikwirakwira ry’icyorezo. Mwakoze neza, muvandimwe wange Paul Kagame namwe baturage b’u Rwanda.

Mu buhamya bw’amashusho bwafashwe na OMS, Minisiteri y’Ubuzima yagaragaje ubunararibonye n’amasomo u Rwanda rwigiye kuri COVID-19, n’uburyo Igihugu cyabashije kwitwara mu rwego rwoguhangana n’icyorezo kuva cyagagaragara tariki ya 14 Werurwe kugeza ubu.

OMS ishimira u Rwanda uburyo rwihutiye gushyiraho ingamba zo kwirinda, by’umwihariko ishima ubuyobozi bw’intangarugero butazuyaje gukorana n’abaturage mu gushyira mu bikorwa ingamba zikenewe mu bihe bidasanzwe.

U Rwanda rurashimirwa kandi kuba rwarakoresheje ikoranabuhanga n’ubundi buryo bworoshya gukurikirana no kuvura abarwayi ba COVID-19 mu gihugu imbere ndetse no ku mipaka.