Minisiteri y’Ubuzima yatangaje ko uyu munsi tariki ya 24 Mutarama 2021,abantu 2 bahitanywe na COVID-19 bituma umubare w’abamaze kwicwa n’iki cyorezo mu Rwanda ugera kuri 174 mu gihe abanduye bo biyongereyeho 328 bakagera ku 12,975. Uyu munsi hakize abantu 101 mu masaha 24 ashize.

Sponsored Ad

Abahitanwe na Covid-19 mu Rwanda n’umugore w’imyaka 57 I Nyamagabe.Umugabo w’imyaka 63 I Kigali.

Abanduye bashya uko ari 328 babonetse I Kigali: 246, Gatsibo: 13, Rulindo: 11, Kirehe: 9, Gakenke: 8, Karongi: 6, Musanze: 6, Nyagatare: 5, Ruhango: 5, Rubavu: 4, Huye: 3, Muhanga: 3, Ngoma: 3, Gicumbi: 2, Kamonyi: 1, Nyamasheke: 1, Nyanza: 1, Rwamagana: 1.

Umubare w’abamaze gukira Covid-19 bose mu Rwanda ni 8,420 nyuma yo gupimwa bagasangwa nta bwandu bagifite mu gihe 4,381 bakirwaye aho bakiri kwitabwaho.

Ibimenyetso bya Covid-19 birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwirinda imihuro itari ngombwa no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Perezida wa Repubulika Iharanira Demokarasi ya Congo, Felix Tshiseked yatangaje ko igihugu cye cyavumbuye imiti ibiri ihashya Coronavirus, ariko Ishami ry’Umuryango w’Abibumbye ryita k’Ubuzima OMS ntirirayemeza.

Tariki 11 Mutarama, ubwo Perezida Tshisekedi yavugaga kuri iyi miti yagize ati “Urukingo ni ngombwa, ariko nanone dufite imiti ikiza. Ndizera ko dufite imiti ibiri itanga icyizere dukurikije ibyavuye mu igeragezwa ryayo bwa mbere. Iyi miti ni iminye-Congo. Tugiye gutangira kuyamamaza.”

Étienne-Flaubert Batangu Mpesa, umushakashatsi wavumbuye umwe muri iyo miti ukorera mu kigo cy’ubushakashatsi bw’imiti cya Luozi (CRPL), yavuze ko umuti yavumbuye witwa ‘Manacovid’ “wavuye mu bimera bivamo imiti.”

Inzu zicuruza imiti muri Kinshasa zatangiye gucuruza uyu muti wa Manacovid, aho icupa rimwe rigura amadolari 110 ni ukuvuga ibihumbi 108 Frw.

Minisitiri w’Ubuzima muri iki gihugu, Eteni Longondo, nawe yishimiye ibyavuye mu igeragezwa ry’uyu muti, ndetse wabonye icyemezo kiwemerera kujya ku isoko ry’imiti icuruzwa mu gihe cy’imyaka itanu nkuko AFP ibitangaza.

OMS yagize amakenga imaze kumva iri tangazo gusa abakozi bayo i Brazzaville bavuze ko batarahura n’uwavumbuye uyu muti, ndetse nta n’ubwo baravugisha ubuyobozi bw’iki gihugu ku birebana n’uyu muti.

Bagize bati “Dukurikije ibyavuzwe na Perezida Tshisekedi, tugiye gutangira gukusanya amakuru kuri iyi ngingo. Kugerageza umuti ni ingenzi kugira ngo hagaragazwe igihamya gishingiye ku bushakashatsi ndetse n’umutekano wawo ku bijyanye n’uko ukora n’akamaro kawo, yaba ari uwa gakondo cyangwa ari uwa kizungu.”

Hari undi muti witwa ‘Articovid’ wavuye mu kimera kitwa Artemisia, watangajwe mu cyumweru gushize wakozwe na Jérôme Munyangi, wiyita umuganga n’umushakashatsi.

Munyangi nawe ari gushakisha uburyo wazemerwa cyangwa ugahabwa icyemezo kiwemerera kujya ku isoko na Minisiteri y’Ubuzima muri icyo gihugu.

Kugeza ubu abamaze kwandura Covid-19 muri RDC ni 21, 597, muri bo 647 bamaze gupfa guhera muri Werurwe 2020.