Kigali
startimes

Bunani watabaye umwana wari ugiye gutwarwa n’amazi yahawe akazi ahishura umushahara agiye guhabwa n’umukoresha we mushya

Amakuru   Yanditswe na: Dusingizimana Remy 12 February 2020 Yasuwe: 7560

Umugabo witwa Bunani Jean Claude w’imyaka 26 watabaye umwana wari ugiye gutwarwa n’amazi menshi yari muri ruhurura ya Nyabugogo ku wa Gatandatu taliki ya mbere Gashyantare 2020,yabonye akazi muri Polyclinique de l’Etoile ndetse ngo mbere yo gutangira aka kazi kazajya kamuhesha ibihumbi 70 FRW ku kwezi yahawe n’ibihumbi 50 FRW byo kumufasha kwisuganya na Meya Kayisime Nzaramba.



Ubwo y’imvura nyinshi yari iri kugwa mu Mujyi wa Kigali kuwa 01 Gashyantare uyu mwaka,akana k’imyaka 6 kagaragaye gahagaze rwagati mu mazi ya ruhurura ya Nyabugogo bigaragara ko amazi agiye kugatwara,abantu bose batinya kujyamo kugatabara uretse uyu mugabo Bunani Jean Claude wagize ubutwari arabikora.

Benshi bakozwe ku mutima n’iki gikorwa,baha inkunga zitandukanye Bunani kugeza ubwo n’akarere ka Nyarugenge kamwakiriye kamusezeranya kumushakira akazi.

Uyu mugabo wabonye akazi muri iki cyumweru muri Polyclinique de l’Etoile bikomeye mu mujyi wa Kigali yabwiye INYARWANDA TV ko ibyo yakorewe n’abanyarwanda ndetse n’Ubuyobozi bw’igihugu byamurenze ndetse mu mvugo ye humvikanamo gushimira.

Yagize ati “Maze igihe mbona ibyiza kubera Imana.Ntacyambuza kwishima.Umujyi wa Kigali wamaze kubyumva untumaho njya ku biro mpura na Meya wari wantumyeho ampa ibihumbi 50 FRW arangije arambwira ati “Bunani dore n’Imana iguhaye akazi kazajya kaguhemba ibihumbi 70 FRW ku kwezi.Urumva n’ibyishimo ku muntu wakoreraga 1500 ku munsi.Sinabura kwishima ngashimira na Meya nubwo ntacyo mfite namushimira gusa nibigenda biza buhoro buhoro nzamushimira.”

Uyu mugabo yavuze ko Meya yamweretse uzamugeza ku kazi nyuma yo kukamusezeranya ari nawe wakamugejejeho.

Bunani wavuze ko atazi gusoma no kwandika,yahawe akazi ko gucunga umutekano akareba icyinjiye muri ibi bitaro n’igisohotse ari nayo mpamvu yavuze ko yishimiye guhembwa nk’ufite dipolome kandi ntayo agira.

Bunani yavuze ko umuyobozi w’ibi bitaro yamubwiye ko kubera igikorwa cy’ubutwari yakoze atabura akazi akora mu bitaro bye anamuha ibihumbi 50 FRW byo kumufasha kwitegura.

Uyu mugabo yavuze ko yari yarihebye,umuryango we wabaga mu bukene ariyo mpamvu atize gusa ashima Leta kubera ibyo ikomeje kumukorera.Yavuze ko akazi kamuhemba menshi yakoze ari ako kuragira inka kamuhembaga ibihumbi 12 FRW ku mwaka.

Bunani ukomoka mu Karere ka Huye mu majyepfo y’u Rwanda yasize umugore we n’umwana umwe, aza i Kigali kubahahira,akaba yari asanzwe akora imirimo y’ingufu mu bice bya Nyabugogo i Kigali.

Bunani yavuze ko atari ubwa mbere atabaye umwana kuko ngo mu myaka ishize ubwo yari aragiye inka z’umukire i Nyanza ahitwa Nyamagana,yasanze umwana washakaga gufata ifi yapfuye yarohamye mu mazi abantu batinye kumutabara ahita yinjira mu mazi aroga aramutabara.

Uyu mwana Bunani yatabaye ubu afite imyaka nka 15 ariko ngo yamutabaye ari mu kigero cy’imyaka isaga 8.


Ibitaro Bunani agiye kuzajya akoraho

Amafoto: IGIHE

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?
    Log in

    Amategeko n'amabwiriza birkurikizwa


Inzindi nkuru

Habonetse abantu 19 banduye Coronavirus mu Rwanda hakira abantu...

Kuri uyu wa Gatatu tariki ya 15 Nyakanga 2020,abanduye coronavirus bashya...
15 July 2020 Yasuwe: 1060 0

Utugari tumwe two muri Nyamasheke na Nyamagabe twasubijwe muri gahunda ya...

Minisiteri y’Ubutegetsi bw’Igihugu (MINALOC) yatangaje ko kubera icyorezo cya...
14 July 2020 Yasuwe: 1522 0

Habonetse abarwayi 38 ba Coronavirus bashya mu Rwanda hakira...

Kuri uyu wa Kabiri tariki ya 14 Nyakanga 2020, abanduye Coronavirus bashya...
14 July 2020 Yasuwe: 1441 1

Habonetse abantu 48 banduye Coronavirus mu Rwanda hakira 26

Uyu munsi tariki ya 13 Nyakanga 2020,abanduye Coronavirus bashya mu Rwanda...
13 July 2020 Yasuwe: 1791 1

Habonetse abantu 38 banduye Coronavirus mu Rwanda hakira abandi...

Uyu munsi tariki ya 12 Nyakanga 2020, abanduye Coronavirus mu Rwanda...
12 July 2020 Yasuwe: 1597 0

Covid-19 yahitanye umuntu wa Kane mu Rwanda, yari umusaza w’imyaka...

Uyu munsi tariki ya 11 Nyakanga 2020,habonetse undi muntu wa Kane...
11 July 2020 Yasuwe: 12325 0