Minisiteri y’Ubuzima yatangaje ko uyu munsi tariki ya 07 Mata 2020, nta murwayi mushya wa Coronavirus wabonetse mu Rwanda mu bantu 806 bapimwe aho yanatangaje inkuru nziza ko abandi bantu batatu bari barwaye iyi ndwara bakize.

Sponsored Ad

Imibare y’abanduye Coronavirus mu Rwanda ikomeje kugenda igabanuka cyane kuko ejo hari habonetse umurwayi umwe,mu gihe ku Cyumweru habonetse abantu babiri gusa.Abantu bamaze kwandura iyi ndwara mu Rwanda ni 105 barimo 7 bamaze kuyikira.

MINISANTE yavuze ko abarwayi bose uko ari 98 basigaye bavurirwa ahantu habugenewe kandi bari koroherwa. Abenshi muri bo ngo nta bimenyetso bya Coronavirus bakigaragaza. Nta n’umwe urembye.

Kugeza ubu Abanyarwanda basabwa kubahiriza ingamba zashyizweho na Leta y’u Rwanda zo kwirinda icyorezo cya Koronavirusi zirimo kuguma mu ngo, gukaraba intoki kenshi,guhamagara nimero 114 igihe wibonyeho ibimenyetso bya Coronavirus birimo inkorora,umuriro mwinshi no kunanirwa guhumeka.

Ku cyumweru tariki ya 05 Mata 2020, nibwo abantu 4 ba mbere bakize Coronavirus basezerewe nyuma y’aho abaganga bemeje ko bakize iki cyorezo.

Batatu mu basezerewe ni Abanyarwanda naho umwe akomoka mu gihugu cy’u Burundi.

Mu minsi isaga 20 bamaze bitabwaho n’abaganga mu kigo cya Kanyinya gifashirizwamo abarwayi ba koronavirusi, ngo icyizere cyo gukira cyakomeje kwiyongera, byumwihariko k’uyu Umurundi NAHIMANA Fabrice wemeza ko yeretswe urukundo na buri wese mu bamwitagaho.

Nubwo ku ikubitiro hasezerewe abarwayi 4 , umuyobozi w’ikigo cya Kanyinya gifashirizwamo abanduye icyorezo cya koronavirusi, Capt. Dr. NAHAYO Ernest, yavuze ko hari abandi benshi bameze neza ndetse bari hafi gusezererwa none nyuma y’iminsi 2 hasezerewe 3.

Umuyobozi w’ikigo cy’igihugu cy’ubuzima RBC, Dr. Sabin NSANZIMANA avuga ko kuba mu Rwanda hari abarwayi barimo gukira icyorezo cya koronavirusi ari ikimenyetso kigaragaza ko aribwo urugamba rwo guhangana n’iki cyorezo rugitangira.

Abamaze kwandura iyi ndwara ku isi ubu bararenga miliyoni 1,4 nkuko bivugwa na kaminuza y’ubushakashatsi ya Johns Hopkins.

Muri Africa kugeza muri iri joro umubare w’abanduye iki cyorezo ni 10,252. Abo yishe ni 492 naho abayikize ni 989 nkuko bivugwa n’ishami ryita ku byorezo mu muryango w’ubumwe bwa Africa.

Muri East African Community, uko abayanduye bahagaze;

Kenya - 172
Rwanda - 105
Uganda - 52
Tanzania - 24
Burundi - 3
South Sudan - 1