skol
fortebet

COVID19:Habonetse abarwayi 11 bashya mu Rwanda, hakira 6 kuri iki cyumweru

Yanditswe: Sunday 31, May 2020

Sponsored Ad

Minisiteri y’ubuzima yatangaje ko uyu munsi tariki ya 31 Gicurasi 2020, mu Rwanda habonetse abanduye Coronavirus bashya 11. Ni ukuvuga ko abamaze kwandura iyo ndwara mu Rwanda babaye 370. Uyu munsi hakize abantu 6 bityo abamaze gukira bose baba 256. Abakirwaye baba 113 mu gihe hamaze gupfa umuntu 1 gusa.

Sponsored Ad

Amakuru mashya ya COVID-19 mu Rwanda kuri iki Cyumweru:

▪︎Habonetse abarwayi 11 kuri iki Cyumweru.
▪︎Abanduye bose ni 370.
▪︎Ibipimo byafashwe uyu munsi ni 1092
▪︎Hakize 6 (Hamaze gukira 256 muri rusange)
▪︎Abakirwaye ni 119.
▪︎Hamaze gupfa umuntu umwe

MINISANTE yatangaje ko aba barwayi 11 bashya ari abanyarwanda baturutse hanze,abatwara amakamyo n’abacuruzi bambukiranya imipaka.Abarwayi bashyizwe mu kato kandi abo bahuye bose bahise bakurikiranwa mu buryo bukwiriye.

Abaturarwanda barasabwa gukaza ingamba zo kwirinda icyo cyorezo bakurikiza amabwiriza yo kwambara agapfukamunwa, kubahiriza intera ya metero ndetse nogukaraba kenshi n’amazi meza ndetse n’isabune cyangwa arukoro yabugenewe.

Imibare yatangajwe ku rwego mpuzamahanga yerekana ko muri Afurika abamaze kwandura COVID-19 bageze ku 142,289 barimo 59,864 bakize n’abandi 4,084bahitanywe na cyo. Abamaze kwandura ku Isi bangana na 6,236,345 barimo abakize 2,781,915 n’abapfuye 373,198. Bivuze ko abakirimo kwitabwaho n’abaganga ku Isi bangana na 3,081,189.

Guhera kuri uyu wa Mbere tariki ya Mbere Kamena 2020,nibwo ingendo zambukiranya intara zose n’umujyi wa Kigali zifungurwa nyuma yo guhagarikwa guhera kuwa 21 Werurwe 2020.

Umuyobozi Mukuru wa RBC,Dr. Nsanzimana Sabin yabwiye RBA kuri iki cyumweru ko kuba ingendo zihuza Intara n’Umujyi wa Kigali zigiye gusubukurwa nta mpungenge biteye kuko kugeza ubu ibipimo bifatwa bigaragaza ko nta cyorezo kiri gukwirakwira imbere mu gihugu.

Yemeje ko abarwayi bashya bagaragara muri iyi minsi bose baba baturutse hanze y’igihugu. Gusa agasaba abantu bose gukomeza ingamba zashyizweho zo guhangana n’iki cyorezo.

Yavuze kandi ko n’ubwo ingendo zigiye gusubukurwa, inzego z’ubuzima zikomeza gukurikiranira hafi mu rwego rwo gukomeza gukumira Coronavirus.

Dr Nsanzimana yavuze kandi ko n’ubwo ingendo zihuza Intara n’Umujyi wa Kigali zisubukuwe, abantu badakwiye gutezuka ku ngamba zafashwe, kuko bitabaye ibyo haramutse hagaragaye ubwandu bushya hafatwa n’izindi ngamba.


Leave a Reply

Your email address will not be published. Required fields are marked *

Who are you?

Amategeko n'amabwiriza birkurikizwa