Kuri iki Cyumweru taliki ya 22 werurwe 2020,Minisiteri y’Ubuzima mu Rwanda yatangaje ko hagaragaye abandi barwayi babiri ba Coronavirus. Ibi byatumye umubare w’abamaze kwandura iki cyorezo mu Rwanda ugera kuri 19.

Sponsored Ad

Mu gihe ku munsi w’ejo hatagaragaye umubare n’umwe w’abanduye COVID-19,kuri iki cyumweru hagaragaye abantu 2 batumye umubare w’abanduye iki cyorezo ugera kuri 19.

Aba barwayi bashya bombi ni Abanyarwanda bavanye Coronavirus hanze, bakaba batangiye kwitabwaho n’abaganga.Bombi n’abagabo b’imyaka 32 y’amavuko.

Umwe yavuye i Dubai ku wa 19 Werurwe 2020 undi ava i Dubai ku wa 20 Werurwe 2020.

Coronavirus yageze mu Rwanda kuwa 14 Werurwe 2020,igaragaye bwa mbere ku Umuhinde wari umaze iminsi mike avuye iwabo.

Minisiteri y’Ubuzima irakomeza gusaba abanyarwanda gukomeza kubahiriza amabwiriza yo kwirinda Coronavirus yashyizweho n’inzego z’ubuzima.

Kugeza ubu abanduye iyi ndwara ku isi bamaze kurenga 323,000 abo yishe ni 13,745 naho abamaze kuyikira ni 90,006.

Mu bihugu by’umuryango wa Afurika y’iburasirazuba, u Rwanda nirwo rufite umubare munini w’abafite iyi ndwara kugeza ubu, Kenya 15, Tanzania 12, Uganda 1 naho muri Sudani y’Epfo n’u Burundi nta bantu bafite iyi ndwara barahaboneka.