skol
Kigali
startimes

Ubwiyongere bw’abarenga ku mabwiriza yo kwirinda Coronavirus i Rubavu

Amakuru   Yanditswe na: Martin Munezero 27 July 2020 Yasuwe: 1038

Ubuyobozi bw’Akarere ka Rubavu bumaze gufata abaturage 82 nyuma yo gusangwa mu bikorwa bitandukanye barenze ku mabwiriza yo kwirinda icyorezo cya Covid-19



Abaturage 59 bafashwe basanzwe mu tubari kandi bitemewe, abakoraga ingendo zitemewe nyuma ya saa tatu z’ijoro, abandi ni abafashwe mu mu gitondo cyo ku Cyumweru bari muri siporo ku nkengero z’ikiyaga cya Kivu kandi bitemewe.

Umwe muri aba baturage bo mu karere ka Rubavu bafashwe barenze ku mabwiriza ya Minisiteri agamije kwirinda ikwirakwiza ry’icyorezo cya Covid-19 yagize ati:

Navuye mu kazi numva nshonje njya aho bakora Lorex, niyo nagiye kurya mbona abamotari bamaze kuva mu muhanda mpitamo kugenda n’amaguru rero ubwo bamfashe ngiye kugera mu rugo banjyana muri stade. Isomo nkuyemo ni uko ntazongera kurenza amasaha yagenwe nkiri mu muhanda, nzajya ntaha mbere y’igihe.

Imibare itangazwa n’ubuyobozi bw’inzego zishinzwe ubuzima mu karere ka Rubavu igaragaza ko muri aka karere hari abantu 150 bakekwaho Coronavirus bashyizwe mu kato mu bigo byateganyijwe aho bari gusuzumwa.

Hari kandi abandi bantu bagera kuri 50 banduye Coronavirus bari kuvurirwa mu bigo byabugenewe bya Rugerero na Nyakiriba.

Bamwe mu baturage bo muri aka karere bavuga ko kuba hari bagenzi babo bakomeje kutubahiriza amabwiriza yashyizweho bishobora gutuma aka karere kongera gusubira muri gahunda ya Guma mu rugo. Umwe yagize ati:

Tuziko icyorezo cyageze muri aka karere kandi n’ingaruka ziri kugenda zitugeraho, kandi mu gihe hari bamwe barenga ku mabwiriza ntibayubahirize urumva ko ari ikibazo ku baturage bamwe na bamwe bakomeje gufungirwa ibikorwa byabo.

Akarere ka Rubavu gahana imbibi na Repubulika Iharanira Demukarasi ya Congo ntabwo ari ubwa mbere kaba gashyiriweho gahunda ya Guma mu rugo mu buryo bw’umwihariko.

Umuyobozi w’Akarere Wungirije ushinzwe Iterambere ry’Ubukungu, Nzabonimpa Deogratias yavuze ko mu bafashwe hari abasanzwe mu mihanda saa munani z’ijoro batarataha kandi bitemewe. Yagize ati:

Niyo mpamvu dukaza ingamba amasaha 24/24. Nk’aba hari abo twafashe saa munani z’ijoro, ubundi isaha yanyuma yo kuba umuntu agendagenda ni saa tatu z’ijoro ariko biratangaje cyane kubona turi mu mihanda saa saba, saa munani z’ijoro abantu tukabafata bihereye ahantu baganira.

Nzabonimpa yatangaje ko aba bose bafashwe nyuma yo kwigisha bararekurwa bamaze gutanga amande kandi bagashyirwa mu kato mu ngo zabo.

Imibare ya Minisiteri y’Ubuzima yo ku wa 26 Nyakanga 2020, igaragaza ko mu Rwanda hamaze gufatwa ibipimo 242, 129 byagaragayemo abarwayi 1,821. Abantu 918 bamaze gukira neza iki cyorezo ndetse batashye iwabo mu ngo, mu gihe abakirwaye ari 898 naho abamaze guhitanwa n’iki cyorezo ni batanu.

Author : Martin Munezero

Munezero Martin ni Umwanditsi w’Ikinyamakuru Umuryango. Yatangiye gukorera iki kinyamakuru muri Nzeli 2014.

Imbuga nkoranyambaga ze:

Instagram:Martin Promoter
Facebook:Munezero Martin
Twitter :Martin Promoter

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Umugabo w’imyaka 45 yahitanwe na Covid-19 mu Rwanda abandi 32...

Minisiteri y’Ubuzima yatangaje ko uyu munsi tariki ya 04 Ukuboza...
4 December 2020 Yasuwe: 1405 0

Abantu 17 banduye Covid-19 mu Rwanda abandi 21 barakira

Uyu munsi tariki ya 03 Ukuboza 2020,mu Rwanda habonetse abanduye Covid-19...
3 December 2020 Yasuwe: 807 0

Covid-19 yahitanye umuntu wa 50 mu Rwanda abandi 46 barayandura

Minisiteri y’Ubuzima yatangaje ko kuri uyu wa Gatatu tariki ya 02 Ukuboza...
2 December 2020 Yasuwe: 1340 0

Minisiteri ya siporo yatangaje ibisabwa ku bakorera imyitozo muri...

Inama y’Abaminisitiri yabereye muri Village Urugwiro yabaye kuwa Gatanu...
2 December 2020 Yasuwe: 1063 0

Abantu 14 banduye COVID-19 mu Rwanda abandi 28 barayikira

Minisiteri y’Ubuzima yatangaje ko uyu munsi tariki ya 01 Ukuboza 2020...
1 December 2020 Yasuwe: 797 0

Covid-19 yahitanye umugore w’imyaka 40 I Kigali abandi 15 barayandura

Minisiteri y’Ubuzima yatangaje ko uyu munsi tariki ya 30 Ugushyingo...
30 November 2020 Yasuwe: 1054 0