Minisiteri y’Ubuzima yatangaje ko uyu munsi tariki ya 29 Ugushyingo 2020,umugore w’imyaka 25 yahitanwe na Covid-19,aba umuntu wa 48 uhitanwe n’iki cyorezo mu Rwanda.

Sponsored Ad

MINISANTE yavuze abantu 28 basanganywe ubwandu bwa Coronavirus, mu gihe nta n’umwe wayikize,mu bipimo 2,042 byafashwe mu masaha 24 yashize.

Abarwayi bashya basanzwe I Kigali: 8, Musanze: 8, Rubavu: 4, Rusizi: 3, Gicumbi: 2, Nyagatare: 1, Gatsibo: 1, Burera: 1.

Umubare w’abamaze kwandura Coronavirus kuva umurwayi wa mbere agaragaye mu Rwanda ku wa 14 Werurwe 2020, bamaze kuba 5,919 mu bipimo 624,115 bimaze gufatwa.

Abamaze gukira bagasezererwa ni 5,480 mu gihe 391 bakiri kwitabwaho n’abaganga.

Kugeza ubu nta muti n’urukingo bya Coronavirus biraboneka, hakoreshwa uburyo bwo kuvura ibimenyetso by’iki cyorezo gusa, kugeza umubiri w’umuntu wubatse ubudahangarwa, virus igashira ityo mu maraso.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Umuyobozi w’ikigo gishinzwe ubushakashatsi mu by’ubuzima mu Buhinde, Balram Bhargava yatangaje ko nubwo urukingo rw’icyorezo cya Coronavirus rwaboneka, abantu bazakomeza kwambara udupfukamunwa nk’uburyo bwizewe kandi bworoshye bwo kwirinda.

Yavuze ko agapfukamunwa ari urukingo rwiza kandi rworoheye buri wese kurubona, kurusha gutegereza inkingo zisanzwe ziri gukorwa n’ibigo by’ubushakashatsi ku ndwara z’ibyorezo.

Yagize ati “Na nyuma y’uko urukingo ruboneka, ikoreshwa ry’udupfukamunwa rizakomeza hirindwa Covid-19. Agapfukamunwa ni urukingo rw’urukorano. Ntabwo twakwirengagiza umusanzu wako mu guhashya ikwirakwira rya Coronavirus.”

Yavuze ko n’inkingo muri icyo gihugu zigeze kure zishakishwa, aho hari ubwoko butanu buri gukorerwaho igeragezwa harimo bubiri bwakorewe mu Buhinde.
Ibigo bitandukanye muri Amerika n’I Burayi biherutse gutangaza ko inkingo zabyo zitanga icyizere. Nk’urwa Pfizer na BioNTech rukora ku kigero cya 95 %.