Ikipe ya Liverpool yamaze kubona umusimbura w’umutoza w’umunyabigwi wayo Jurgen Klopp aho yumvikanye n’Umuholandi Arne Slot, w’imyaka 45,imukuye muri Feyenoord y’iwabo.

Sponsored Ad

Ikipe ya Liverpool yemeye gutanga hagati ya miliyoni 13 na 15 z’ama Euros nk’amafaranga yo kugura amasezerano y’uyu mutoza.

Uyu Arne Slot azaba ari we mutoza wa mbere w’Umuholandi uhenze mu mateka kubera aka kayabo Liverpool yamutanzeho.

Amakuru y’ubwumvikane bwa Arne Slot, watozaga Feyenoord, na Liverpool yemejwe bwa mbere na Fabrizio Romano,umunyamakuru uyoboye abandi mu gutangaza amakuru y’isoko ryo kugura no kugurisha abakinnyi.

Ibintu byose byarangiye ubu hasigaye gusinya amasezerano hagati y’impande zombi.

Uyu mutoza yaherukaga gutangaza ko yifuza gutoza Liverpool mu mwaka w’imikino utaha ndetse ko yifuza ko impande zombi zumvikana vuba.

Uyu mutoza yari amaze guhesha Feyenoord ibikombe 2 (igikombe cy’igihugu (KNVB Cup) baherutse gutwara ku ya 21 Mata 2024, ndetse n’icya Shampiyona y’Ubuholandi Eredivisie, batwaye mu mwaka w’imikino ushize 2022-2023, iyi kipe yari imaze imyaka 7 idatwara.