Umunyezamu wa Rayon Sports,Kimenyi Yves waraye ubaye intwari mu mukino wa ½ iyi kipe yasezereyemo Police FC mu gikombe cy’Agaciro,yahawe akayabo k’amafaranga n’abafana ba Rayon Sports uruhago yari yitwaje ruruzura,ibyishimo biramurenga ararira.

Sponsored Ad

Kimenyi Yves yagaragarijwe urukundo n’abafana ba Rayon Sports nyuma yo kuyifasha kugera ku mukino wa nyuma w’Irushanwa ry’Agaciro 2019, akuyemo penaliti ebyiri za Police FC,bituma iyi kipe ye itsinda penaliti 4-3.

Aka kazi ntikagombaga kuba imfabusa imbere y’abafana ba Rayon Sports,bahise bamuhamagara,agenda aca iruhahnde rwa stade bamumenaho imvura y’amafaranga.

Kimenyi yavuye ku muryango wa 11 agera muri 17 atoragura amafaranga yahabwaga n’abafana ba Rayon Sports, igikapu cyanditseho Agaciro yayashyiragamo kiruzura.

Ubwo yaganiraga n’abanyamakuru,ikiniga cyamufashe kubera urukundo yari amaze kwerekwa,niko kurira ndetse avuga ko iki kiri mu bihe byiza atazibagirwa nk’umukinnyi w’umupira w’amaguru .Kubera ukuntu aya mafaranga yari menshi cyane,Kimenyi yafashijwe n’ushinzwe discipline muri Rayon Sports Gatete Ahmed,n’abanyamakuru batandukanye.

Yagize ati " Ndishimye birenze,birenze ariko...kuva nakina umupira wanjye, no mu gihe cyose nzabaho,sinzi, ni urukundo rwinshi, birandenze kabisa (aha yahise afatwa n’ikiniga, yipfuka mu maso)."

Kimenyi yabwiye abafana ko kwitwara neza kuri penaliti yabifashijwemo n’umutoza ndetse na mugenzi we Mazimpaka Andre bamugiriye inama yo kutagira igihunga nokureba umukinnyi ugiye gutera penaliti mu maso.Yavuze ko we na bagenzi be bifuza gushyira iki gikombe mu bindi 2 baheruka gutwara.

Ubu butwari bwa Kimenyi bwatumye atorwa nk’umukinnyi w’umukino ndetse ikirenzeho afashe Rayon Sports yavuze ko akunda cyane kubona itike yo kwerekeza ku mukino wa nyuma w’Agaciro 2019 izahuriraho na Mukura VS aho itwaye igikombe cyaba kibaye icya 3 yikurikiranya.

Kimenyi Yves niwe munyarwanda wa mbere abafana ba Rayon Sports bahundagajeho amafaranga nyuma yo kubikorera Jules Ulimwengu na Micheal Sarpong mu minsi yashize.

Kimenyi yarijijwe n’urukundo abafana ba Rayon Sports bamweretse