Umutoza ukomoka muri Serbia, Zlatko Krmpotic wanzwe n’abafana ba APR FC kubera ukuntu yasanze ikipe ihagaze neza akayisubiza inyuma,yasinye amasezerano y’umwaka umwe muriPolokwane City yo mu cyiciro cya mbere muri Afurika y’Epfo.

Sponsored Ad

Uyu mutoza watoje APR FC guhera tariki ya 8 Gashyantare 2019,ntiyakoze ku mutima abakunzi bayo kuko yatsinzwe umusubirizo bituma bamwanga ndetse atwarwa igikombe cya shampiyona na mukeba Rayon Sports.

Kuwa kabiri nyuma ya saa sita nibwo umutoza Krmpotic yagiranye ibiganiro n’ubuyobozi bwa Polokwane bemeranya ko agomba gutoza ikipe mu gihe kingana n’umwaka umwe.

Krmpotic w’imyaka 68,yasinyiye Polokwane amasezerano y’umwaka umwe,asimbura umunya Slovakia,Jozef Vukusic, weguye nyuma y’umwaka w’imikino ushize yitwayemo neza muri iyi kipe itazirwa Rise and Shine.

Ikipe ya Polokwane City yarangije ku mwanya wa 5 muri shampiyona ya Absa Premiership ishize,ikaba yahaye akazi Krmpotic ngo ayifashe gutera intambwe irenze.

Zlatko Krmpotic yatoje amakipe nka Zesco United, Serbia U19, Don Bosco, Kazama n’ayandi yaherukaga gutoza muri Afurika y’Epfo mu ikipe ya Royal Eagles.