Abafana b’ikipe ya Flamengo yo muri Brazil bishimiye birenze kuba iyi kipe yabo yaratwaye igikombe cya Copa Libertadores gihuza amakipe yabaye aya mbere iwayo muri Amerika y’Amajyepfo bituma batera abapolisi amabuye,mu muhango wo kwakira ikipe.

Sponsored Ad

Kuwa Gatandatu w’icyumweru gishize nibwo Flamengo yatwaye iki gikombe itsinze ku mukino wa nyuma River Plate yo muri Argentina ibitego 2-1,bituma abafana bayo basaga ibihumbi mirongo 30 bajya kuyakira barimo n’aba barenzwe n’ibyishimo batangira gutera amabuye,amacupa n’ibindi bintu polisi.

Abapolisi bananiwe kwihangana,babahukamo,babakubita ndembo karahava bamwe bakwira imishwaro,abandi barashikama barwana inkundura.

Nubwo aba bafana bishe uyu munsi mukuru,abafana beza barimo abagore n’abagabo bari biyambariye imyenda y’umutuku n’umukara bitwaje n’amabendera baje kwakira ikipe yabo yari imaze imyaka 38 idatwara iki gikombe kiruta ibindi muri Amerika y’Amajyepfo.

Ikipe ya Flamengo yatambagiye umugi wa Rio de Janeiro iri mu modoka ifunguye hejuru yereka abafana iki gikombe yatwaye ku kaburembe kuko yabonye ibitego 2 mu minota 3 ya nyuma bitsinzwe na rutahizamu Gabigol.