skol
fortebet

Amerika yiyemeje kubuza abanyamahanga baherutse mu Bushinwa kwinjira ku butaka bwayo kubera Coronavirus

Yanditswe: Saturday 01, Feb 2020

Sponsored Ad

Leta Zunze Ubumwe z’Amerika zatangaje ibihe bidasanzwe mu rwego rw’ubuzima kubera coronavirus ikomeje gukwirakwira ndetse zivuga ko zizangira kuhinjira umunyamahanga wese wasuye Ubushinwa mu byumweru bibiri bishize.

Sponsored Ad

Alex Azar, umunyamabanga ushinzwe ubuzima w’Amerika, ejo ku wa gatanu yavuze ko Abanyamerika basubira mu gihugu cyabo bavuye mu ntara ya Hubei, aho iyo ndwara yatangiriye, bazashyirwa mu kato mu gihe cy’iminsi 14.

Bwana Azar yavuze ko izo ngamba nshya zizatangira gushyirwa mu bikorwa ejo ku cyumweru.

Yongeyeho ko ibyago byo kwandura coronavirus ku Banyamerika "bikiri hasi, kandi kubera izi ngamba nshya n’izabanje, turi gukora kuburyo ibyago [byo kwandura] bikomeza kuba hasi".

Abantu barenga 11,000 ni bo bamaze kwemezwa ko banduye ubu bwoko bushya bw’iyi virusi biganjemo abo mu Bushinwa kuva iyo virusi yagaragara bwa mbere mu kwezi kwa cumi na kabiri.

Abantu barenga 100 bamaze gutangazwa ko banduye iyo virusi hanze y’Ubushinwa, mu bihugu 22.

Ejo ku wa gatanu, Ubushinwa bwatangaje ko umubare w’abamaze guhitanwa na coronavirus bageze kuri 259 barimo 249 bo mu ntara ya Hubei.

Mbere yaho, byagaragaye ko umubare w’abantu bashya banduye coronavirus umaze kurenga uw’abanduye icyorezo cya Sars, cyageze mu bihugu bibarirwa muri za mirongo ku isi mu mwaka wa 2003.

Icyo gihe abantu barenga 8,100 banduye Sars ishegesha bikomeye imyanya y’ubuhumekero mu gihe cy’amezi umunani yamaze. Bose hamwe, abantu 774 ni bo bishwe na Sars.

Ku wa kane w’iki cyumweru, ishami ry’umuryango w’abibumbye ryita ku buzima (OMS/WHO) ryatangaje ko isi iri mu bihe bidasanzwe kubera ubu bwoko bushya bwa coronavirus.

Leave a Reply

Your email address will not be published. Required fields are marked *

Who are you?

Amategeko n'amabwiriza birkurikizwa