Ikipe ya APR FC yari ifite intego yo kugera mu matsinda ya CAF Champions League yananiwe kurenga ijonjora rya mbere muri iyi mikino kuko itsindiwe muri Kenya na Gor Mahia ibitego 3-1 mu gihe mu mukino ubanza yari yatsinze 2-1 nabwo mu buryo butari bunogeye ijisho.

Sponsored Ad

APR FC yari imaze amezi 2 yitegura iyi mikino 2,ntiyabashije kugera mu kiciro gikurikiraho kuko yatsinzwe ibitego 4-3 mu mikino yombi.

APR FC yatsindiwe mu minota y’inyongera kuko iminota 90 y’umukino yarangiye ari igitego 1-1 ndetse Gor Mahia isa n’iyasezerewe.Ibintu byazambye ku ruhande rwa APR FC mu minota 5 y’inyongera.

Gor Mahia yafunguye amazamu ku munota wa 26 ku gitego cyatsinzwe na Samuel Onyango ndetse igice cya mbere cyarangiye ari 1-0.

APR FC yagarutse mu gice cya kabiri iri ku rwego rwo hejuru cyane irusha cyane Gor Mahia byatumye Nsanzimfura Keddy yishyura iki gitego ku munota wa 81 w’umukino.

Abakinnyi ba Gor Mahia binjiye mu kibuga basimbuye nibo batumye APR FC isezererwa itarenze umutaru kuko mu minota 5 y’inyongera bashyizemo ibitego by’intsinzi.

Ku munota wa 92 umukinnyi Sydney Ochieng yashyizemo igitego cya kabiri mu gihe ku munota wa 94 Nicholas Kipkirui yashyizemo igitego cya 3 cyababaje bikomeye APR FC.

APR FC yatsinzwe ku kinyuranyo cy’ibitego 4-3 ubu igikuriyeho ni ugukomereza ku marushanwa y’imbere mu gihugu.

Abakinnyi babanje mu kibuga ku mpande zombi:

Umuzamu: Rwabugili Umar

Ba Myugariro:Ange Mutsinzi, Manzi Thierry,Fitina Ombolenga,Mangwende
Abo hagati: Niyonzima Sefu,Ruboneka Jean Bosco,Niyomugabo Claude, Manishimwe Djabel

Ba Rutahuzamu: Byiringiro Lague na Tuyisenge Jacques

Abakinnyi Gor Mahia ibanza mu kibuga ni:

Gad Mathews
Charles Momanyi
Philemon Otieno
Andrew Juma
Michael Apudo
Bernard Ondiek
Ernest Wendo
Kenneth Muguna (c)
Benson Omalla
Tito Okello
Samuel Onyango

Abasimbura:
Levis Opiyo, Geoffrey Ochieng, Joachim Oluoch, Bertrand Konfor, Sydney Ochieng, Clifton Miheso, Nicholas Kipkurui