Kigali
startimes

FERWAFA yafatiye ibihano Rayon Sports na APR FC kubera urugomo rw’abafana bazo kuri stade Amahoro

Imyidagaduro   Yanditswe na: Dusingizimana Remy 27 May 2019 Yasuwe: 2531

Ishyirahamwe ry’umupira w’amaguru mu Rwanda FERWAFA,ryamaze guca ihazabu y’amafaranga y’u Rwanda ibihumbi ijana ku ikipe ya Rayon Sports ndetse na APR FC kubera ubushyamirane bwaranze abafana b’amakipe yombi ku wa 20 Mata 2019 mu mukino w’umunsi wa 23 wa Shampiyona.



Nyuma y’uyu mukino wari ishyiraniro warangiye Rayon Sports itsinze igitego 1-0 cyabonetse ku munota wa nyuma kuri penaliti yatewe na Sarpong Micheal,abafana b’amakipe yombi bateranye amacupa karahava birangira polisi ihosheje iyi mirwano.

Umwanzuro wo guhana aya makipe yombi wafashwe tariki 23 Gicurasi 2019 na komisiyo ishinzwe imyitwarire ku bibuga (igizwe na Mabano Jules uyikuriye, Me Ndamage Ferdinand uyibereye umunyamabanga na Me Cyaga Eric uyibereye umunyamuryango) hagendewe kuri Raporo y’ushinzwe umutekano ku bibuga, Nzeyimana Felix ndetse n’ubusobanuro bwatanzwe n’uwari uhagarariye APR FC wari yatumijwe n’iyi komisiyo kuko Rayon Sports yo itigeze yitaba inshuro 2 yahamagajwe.

Raporo y’ushinzwe umutekano ku bibuga isobanura ko nyuma y’uko umusifuzi yari asoje umukino , abafana b’amakipe yombi bashyamiranye mu 10 na 11, baterana amacupa y’amazi kugeza aho umuyobozi wa APR FC yavuye muri VVIP yegera abafana abasaba kurekera gushyamirana, birangira ubwo.

Ushinzwe umutekano ku bibuga yaboneyeho gusaba ko amakipe yombi yakurikiranwa kubera imyitwarire mibi yaranze abafana uwo munsi yavuzwe haruguru hakiyongeraho gusunika urugi rwa Stade, gusimbuka uruzitiro no gutera amabuye.

Amakuru avuga ko uwari uhagarariye APR FC witabye wenyine yavuze bibwe ndetse ko bazageza aho basaba ko umukino ubahuza na Rayon Sports wazajya usifurwa n’umusifuzi uturutse hanze y’u Rwanda kuko ngo hagiye haba amakosa ntasifurwe n’umusifuzi kandi ari amakosa agaragara.

Uwari uhagarariye APR FC yavuze ko iby’imyitwarire y’abafana byabazwa ikipe yari yakiriye umukino ariyo Rayon Sports kuko ngo yakabaye yaritwararitse mu gutegura umukino, igateganya aho abafana bajya, ntibabicaze ahantu hegeranye kuko ngo ariyo yaba yarabaye intandaro yo gushyamirana.

Uwari uhagarariye APR FC yavuze ko batishimiye imyitwarire y’abafana babo kuri uwo mukino nubwo ngo habayeho kwiyenza kw’abafana ba Rayon Sports ariko anemeza ko bazahana ababigizemo uruhare kuko ngo bamenye Fan Club baturukamo.

Umwanzuro wa Komisiyo ishinzwe imyitwarire muri FERWAFA

Nyuma yo kumva ibisobanuro by’uwari uhagarariye APR FC,komisiyo yemeje ko imyitwarire y’abafana igomba kuryozwa amakipe yombi ariyo Rayon Sports na APR FC ndetse agatangwa gutanga ihazabu y’amafaranga ibihumbi ijana (100.000 FRW), agatangwa bitarenze iminsi cumi n’itanu kuva bamenyeshejwe iki cyemezo.

Komisiyo ishinzwe imyitwarire yasanze ko imyitwarire abafana bagaragaje idakwiriye kuranga umupira w’amaguru bityo ikaba ibihanangiriza nkuko biteganywa n’ingingo ya 26 y’amategeko agenga imyitwarire y’amategeko agenga umupira w’amaguru mu Rwanda ndetse amakipe yombi akishyura ihazabu y’ibihumbi 100 FRW nkuko biteganywa n’ingingo ya 28 y’amategeko agenga imyitwarire y’umupira w’amaguru mu Rwanda.

Komisiyo ishinzwe imyitwarire muri FERWAFA isoza yibutsa ko kujurira iki cyemezo biba nyuma y’iminsi 2 buri ruhande rukimenyeshejwe.

Uretse Rayon Sports na APR FC, Albert Mphande yahanishijwe igihano cyo kumara imikino itatu ya shampiyona adatoza ikipe ya Police FC ndetse akanatanga ibihumbi ijana by’amafaranga y’u Rwanda (100,000 FRW),nyuma yo kujuririra imyanzuro ya mbere yari yafatiwe yo kumara amezi ane (4) adatoza ndetse akanatanga ibihumbi 50 by’amafaranga y’u Rwanda (50,000 FRW).

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?
    Log in

    Amategeko n'amabwiriza birkurikizwa


Inzindi nkuru

Cristiano Ronaldo ashobora guhura na Real Madrid muri 1/4 cya UEFA...

Uyu munsi habaye tombola ya 1/4 cya UEFA Champions League yarangiye amakipe...
10 July 2020 Yasuwe: 1341 0

Munyakazi Sadate yasubije KNC wareze Rayon Sports muri FERWAFA kubera...

Umuyobozi w’ikipe ya Rayon Sports,Munyakazi Sadate,yibukije Gasogi United ko...
10 July 2020 Yasuwe: 2474 0

Rayon Sports yasabye APR FC kongera kuyitiza Sugira Ernest

Ikipe ya Rayon Sports yashimye umusaruro Sugira Ernest yayihaye ariyo...
10 July 2020 Yasuwe: 1021 0

Thierry Henry yapfukamye iminota 8:46 mbere y’umukino yibuka George Floyd...

Thierry Henry, umutoza w’ikipe ya Montreal Impact akaba n’icyamamare mu...
10 July 2020 Yasuwe: 1850 0

KNC yareze Rayon Sports muri FERWAFA ko ishaka kumutwarira umukinnyi...

Umuyobozi w’ikipe ya Gasogi United,Kakoza Nkuliza Charles (KNC),yandikiye...
9 July 2020 Yasuwe: 3944 0

Robin Van Persie yavuze abakinnyi 3 abona bakwiriye kuvamo uhabwa Ballon...

Uwahoze ari rutahizamu ukomeye muri Arsenal na Manchester United,Robin Van...
9 July 2020 Yasuwe: 2190 0