Ikipe ya Chelsea itaragize umukinnyi n’umwe igura mu kwezi kwa Mbere nyuma yo gukomorerwa ibihano by’imyaka 2 yari yahawe yamaze kugura umukinnyi wayo wa mbere Hakim Ziyech wakiniraga ikipe ya Ajax.

Sponsored Ad

Uyu Hakim Ziyech w’imyaka 26 yaguzwe akayabo ka miliyoni 38 z’amapawundi ziziyongera kubera uko azitwara namara kugera mu ikipe ya Chelsea mu mwaka w’imikino utaha.

Ikipe ya Ajax niyo yatangaje bwa mbere ko yamaze kumvikana na Chelsea kuri uyu mukinnyi wayo mu butumwa yacishije ku rubuga rwayo kuri iki gicamunsi.

Yagize iti “Ajax na Chelsea bamaze kumvikana ku kiguzi cya Hakim Ziyech.umukinnyi azatangira gukinira Chelsea guhera taliki ya 01 Nyakanga 2020.Ararangiriza uyu mwaka w’imikino mu ikipe ya Ajax Amsterdam.

Amakipe yemeranyije ikiguzi cya miliyoni 40 z’amayero ashobora kwiyongera akagera kuri miliyoni 44 bitewe n’impamvu zitandukanye.”

Uyu munya Maroc Ziyech yari afite amasezerano amugeza muri Kamena 2022.

Ziyech n’umwe mu bakinnyi bakina baca ku mpande b’abahanga cyane ndetse ubuhanga bwe bwagaragariye mu mikino ya UEFA Champions League ishize ubwo we na bagenzi be bageraga muri ½ .