Ikipe ya Manchester City yaraye ifatiwe ibihano byo kumara imyaka 2 yikurikiranya itagaragara muri UEFA Champions League iri mbere no gutanga miliyoni 30 z’amayero kubera kwica nkana amategeko yo kugura no kugurisha abakinnyi azwi nka Financial Fair Play.

Sponsored Ad

Financial Fair Play itegeka buri kipe ko itagomba kugira ubusumbane hagati y’amafaranga yarekuye igura abakinnyi n’ayo yinjije mu bo yagurishije.

Ibi Manchester City yanze kubyubahiriza yigurira abakinnyi benshi ntiyagira abo igurisha hagati y’umwaka wa 2012 n’uwa 2016,ariyo mpamvu yahwe ibi bihano biremereye.

Manchester City yaguzwe n’abaherwe bo muri Abu Dhabi yakabaye yarahanwe kera ariko yakomeje kurwana inkundura mu nkiko ariko byanze biba iby’ubusa.

Manchester City ishinjwa kandi kubesha ibijyanye n’amafaranga ihabwa n’abaterankunga bayo kandi nabyo biri mu bigize FFP ndetse no kwanga korohereza UEFA mu iperereza.

Aka kaga Manchester City yahuye nako katurutse ku nkuru ikomeye y’ubucukumbuzi yakozwe n’ikinyamakuru Der Spiegel kuri ibi bijyanye no kurekura amafaranga mu kugura no kugurisha abakinnyi yasohotse mu Ugushyingo 2018.

Manchester City yatangaje ko yababajwe cyane n’ibi bihano ariko nanone itatunguwe na byo.

Hari amakuru avuga ko na Premier League ishobora gukuraho amanota Manchester City kubera ko FFP bakorana gusa ntabwo biratangazwa.Ibi bihano ntibizagera ku ikipe y’abagore ya Manchester city.

Ibi bihano biratuma ikipe ya Manchester City ijya ku gitutu cyogushaka uko yagumana umutoza Pep Guardiola wifuzwa cyane na Juventus ndetse na bamwe mu bakinnyi bayo bashobora kwigendera.

Manchester City yavuze ko igiye kujuririra mu rukiko rukemura imanza za siporo rwa TAS.