Mu gihe amakipe yiteguraga gufungura imyitozo mu matsinda mato, Premier League yafashe ibipimo 748 mu bakinnyi,abatoza n’abandi bakozi b’amakipe babonamo abantu 6 banduye Coronavirus.

Sponsored Ad

Ibi bipimo byafashwe mu minsi ibiri ishize,byagaragaje ko Premier League ikwiriye kwitonda kuko mu bipimo byafashwe uko ari 748 mu bakinnyi n’abatoza hasanzwemo abantu 6 banduye Coronavirus.

Buri kipe yo muri Premier League yatanze abantu 40 mu bakinnyi,abatoza,abaganga n’abandi bakozi kugira ngo basuzumwe.

Amabwiriza avuga ko nta mukinnyi wemerewe kwitoza atabanje gusuzumwa kandi usanganwe ubwandu agashyirwa mu kato wenyine iminsi 7.Buri kipe izajya ipimwa inshuro 2 mu cyumweru kandi ibisubizo biboneka nyuma y’amasaha 24.

Aba bantu 6 banduye Coronavirus basanzwe mu makipe 3 gusa muri 20 akina Premier League ariko ntabwo higeze hatangazwa amazina y’abasanganwe iki cyorezo.

Nubwo abategura Premier League bari gukora ibishoboka byose kugira ngo isubukurwe,aba bantu basanganwe Covid-19 baciye benshi intege cyane ko hari n’abakinnyi batifuza kugaruka mu kazi kubera iki cyorezo.

Kuwa Mbere w’iki Cyumweru,Premier League yatangaje ko amakipe 20 yose yemeye gutangira imyitozo mu matsinda mato y’abakinnyi guhera kuri uyu wa Kabiri.

Itangazo ryasohowe na Premier League uyu munsi rigira riti “Premier League yasuzumye COVID-19 abantu 748 kuwa 17 na 18 Gicurasi 2020,muri abo bose,abantu 6 basanganwe Coronavirus mu makipe 3.Abakinnyi cyangwa abagize ikipe basanganwe Coronavirus barashyirwa mu kato mu gihe k’iminsi 7.”

Premier League yahagaritswe kuwa 13 Werurwe 2020 nyuma y’aho Coronavirus yari yageze mu bakinnyi n’abatoza,aho ku ikubitiro yafashe umutoza wa Arsenal,Mikel Arteta na rutahizamu wa Chelsea,Callum Hudson Odoi.

Umunyamabanga wa leta ushinzwe umuco mu bwongereza, Oliver Dowden,yavuze ko ibiganiro bigeze ku rwego rwiza kugira ngo Premier League izasubukurwe muri Kamena 2020.

Imikino izakinwa nta bafana bari mu masitade ndetse ngo uyu mwanzuro ushobora kuzamara umwaka wose ushyirwa mu bikorwa igihe cyose nta muti cyangwa urukingo biraboneka.Aho iyi mikino izabera ntabwo haratangazwa cyane ko bivugwa ko ishobora gukinirwa ku bibuga byihariye ariko bamwe ngo barifuza ko bakomeza gukinira ku bibuga byabo.

Izi mpaka z’ibibuga bigomba gukinirwaho zishobora gutuma tariki ya 12 Kamena 2020 yari yatanzwe ko shampiyona yasubukurwa yigizwa inyuma.

Ikindi amakipe ari gupfa n’umutekano w’abakinnyi ndetse n’amakipe agomba kumanuka ari gusaba ko shampiyona yagirwa imfabusa ntihagire umanuka.Icyemezo kizafatwa nyuma y’amatora ateganyijwe aho nibura umwanzuro uzemezwa ari uwatowe n’amakipe 14 muri 20 akina premier League.

Shampiyona y’Ubudage,Bundesliga,niyo yabimburiye izindi gusubukurwa muri iyi wikendi ishize,aho amakipe yesuranye karahava.

Izindi shampiyona zitegura gusubukurwa ni La Liga na Serie A ndetse abakinnyi batangiye imyitozo.

Mu Bwongereza,umukinnyi witwa Troy Deeney usanzwe ari kapiteni wa Watford yanze gutangira imyitozo nk’abandi avuga ko azagaruka mu kazi ubwo icyorezo kizaba kirangiye aho yemeje ko niba ubuyobozi bushaka kumwirukana cyangwa kureka kumuhemba bwabikora aho kugira ngo yipfire.

Abandi bakinnyi barimo Raheem Sterling,Sergio Aguero na Tammy Abraham basabye ko ibyo gusubukura shampiyona byahagarara kuko ngo badashaka kuba ibitambo bya Covid-19 kubera amafaranga.